Dadam bolalik davrini va o‘sha og‘ir urush yillarini sira yodidan chiqara olmaydi. Ota-onadan erta ayrilib, Jamila ammam qo‘lida voyaga yetgani va aqli to‘lishib, endi biror kasbning etagini tutaman deganda, ko‘ngillilar qatorida urushga otlanganini har safar bizga hikoya qilib berarkan, qalbimiz g‘ururga to‘ladi. 

Dadam umri davomida qanchadan-qancha sinovlarni boshdan kechirmadi. Yaxshi kunlar keladi, degan umid bilan yashab, kurashdi. Shukrki, orzu qilingan davrlar keldi. Mamlakatimiz osoyishta, aholisi farovon. Hamma tinch-totuv yashab, mehnat qilyapti. Prezidentimizning beqiyos g‘amxo‘rliklari tufayli keksalarga ko‘rsatilayotgan e’tibor, e’zoz va muruvvatdan ko‘nglimiz tog‘dek ko‘tarilmoqda. 

1942-yil o‘n olti nafar qishloqdosh yigitlar bilan urushga ketgan dadam Stalingradda kechayotgan qirg‘inbarot janglarda qatnashadi. So‘ng Vladivos­tokdagi dengiz piyodalari batalyonida harbiy xizmatda bo‘ladi. Bu orada Kavkazni ham fashistlardan himoya etishda qatnashadi. 1947-yilda ona shahrimiz Buxoroga qaytadi. 

Viloyat bosmaxonasida mas’ul lavozimda ishlab, Buxoro pedagogika institutining tarix fakultetida sirtdan o‘qib, diplomli bo‘lgach, Romitan tumanining Chelong‘u qishlog‘idagi o‘rta ta’lim maktabida o‘qituvchilik qiladi. 1969-yildan to 1984-yilgacha ichki ishlar organlarida samarali xizmat qildi. O‘nlab shogirdlar tayyorladi. Rahmatli onamiz bilan yetti nafar farzandni tarbiyalab, voyaga yetkazdi, o‘qitdi, uyli-joyli va kasb-korli qildi. Qisqasi, barchamizni el-yurt xizmatini sharaf deb bilgan kishilar sifatida yetishtirdi. Muxtor akam dadamning izidan borib, kam bo‘lmadi. Afsuski, afg‘on urushida olgan asoratlari tufayli 2007-yil vafot etdi. Olti opa-uka hozir pensiyadamiz. Ayni paytda dadam­ning 19 nabirasi, 38 evarasi va 4 nafar chevarasi bor.  

Bir so‘z bilan aytganda, men shunday insonning farzandi ekanligimdan faxrlanaman. Zero, dadam mening baxtim, davlatimdir. 

Abror MUHSINOV,

mehnat faxriysi.

Buxoro viloyati.

Suratda: viloyat hokimi Botir Zaripov, IIB boshlig‘i, polkovnik Mirjamol Miralimov va boshqa mutasaddilar urush qatnashchisi Ahmed otaga Prezident tabrigi va mukofotlarni topshiqmoqda.