So‘nggi vaqtlarda ommaviy axborot vositalarida firibgarlardan ehtiyot bo‘lishga undovchi chaqiriqlarga tez-tez ko‘zimiz tushyapti. Shunga qaramay, bunday noxush holatlar yo‘l harakati xavfsizligi sohasiga bog‘liq yo‘nalishlarda ham uchramoqda.

Haydovchilik guvohnomalarini olishda yaratilgan shaffof tizim bo‘lajak haydovchilarni yo‘l harakati qoidalarini yaxshi o‘zlashtirishga undayotgan bo‘lsa-da, ayrim shaxslar bu hujjatni olishning «oson» yo‘llarini izlab, noqonuniy xatti-harakatlarni sodir etmoqdalar. Achinarlisi, ko‘plab yurtdoshlarimiz haydovchilik guvohnomasini ma’lum bir qiymatdagi moddiy boyliklar evaziga olib berishni va’da qilgan firibgarlarga ishonib, jinoyat qurbonlariga aylanib qolayotir. 

– Bosh prokuratura huzuridagi departamentning Sirdaryo tumani bo‘limi tomonidan o‘tkazilgan tezkor tadbirda fuqaro go‘yoki viloyat IIB YHXBda ishlovchi tanishlari yordamida «B» toifadagi haydovchilik guvoh­nomasini olib berishi evaziga fuqarodan 700 AQSH dollari va 1,2 million so‘mni olgan vaqtida ushlangan, – deydi IIV JXD YHXX Axborot xizmati yetakchi mutaxassisi, podpolkovnik Dilnoza Rajabova. – Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atildi. 

Vazirlar Mahkamasining 2018-yil 31-maydagi «Avtomototransport vositalari va shahar elektr transporti vositalari haydovchilarini tayyorlash va qayta tayyorlash bo‘yicha nodavlat ta’lim xizmatlarini ko‘rsatish faoliyatini litsenziyalash tartibini yanada takomillashtirish chora-tadbirlari to‘g‘risida»gi qarori bilan milliy haydovchilik guvohnomasini berish tartibi belgilangan. Mazkur qarorga muvofiq, tegishli toifadagi haydovchilik guvohnomasini olish uchun joylardagi haydovchilarni tayyorlash va qayta tayyorlash faoliyati bilan shug‘ullanuvchi, belgilangan litsenziyaga ega bo‘lgan o‘quv tashkilotlarida, tasdiqlangan o‘quv dasturlari asosida tegishli toifalar bo‘yicha har xil muddatda ta’lim oli­shingiz, shuningdek, o‘quv yakuni bo‘yicha berilgan guvohnomaga asosan joylardagi Imtihon markazlarida, bunday markazlar tashkil etilmagan joylarda esa hududiy YHXBlarida nazariy va amaliy imtihonlarni topshirib, haydovchilik guvohnomasini olishingiz kerak bo‘ladi.

Xulosa o‘rnida aytish lozimki, sizga haydovchilik guvohnomasini pul evaziga noqonuniy yo‘llar bilan olib berishni taklif qilayotgan firibgarlardan ehtiyot bo‘ling, ularga aldanib qolmang. Haqiqiy haydovchilik guvohnomasi yo‘llarda siz va yaqinlaringiz, qolaversa, o‘zgalarning hayoti va sog‘lig‘i kafolati ekanligini unutmang.

Sherzod ABDUSAMADOV,

o‘z muxbirimiz.