“Uptown Funk”, “That’s what I like”, “Wakye up in the sky” “24 K Magic” kabi qo‘shiqlari bilan dunyoga tanilgan amerikalik xonanda Bruno Mars qimor o‘ynab, katta qarzga botib qoldi. Bu haqda “News Nation” nashri xabar berdi.   

Qayd etilishicha, qo‘shiqchi Bruno Mars hozirda AQSHdagi kazino va istirohat bog‘larining eng yirik egalaridan biri bo‘lgan “MGM Resorts”dan 50 million dollardan ortiq miqdorda qarzdor.

Ma’lum bo‘lishicha, 2016 yilda qo‘shiqchi MGM bilan ko‘p yillik shartnoma tuzgan va shu kungacha faqat shu kompaniyaning muassasalarida chiqish qilib kelmoqda.

“U kazino bitimidan yiliga 90 million dollar (soliqlar to‘langanidan keyin 60 million dollar) ishlab topadi, lekin u baribir qarzni to‘lashi kerak”, deydi kazino.

38 yoshli xonanda, ayniqsa, pokerni yaxshi ko‘radi va bu o‘yinga katta pul tikishga moyil. Qo‘shiqchi nafaqat musiqa san’ati va qimordan pul topadi, balki MGM’ga tegishli bo‘lgan mehmonxonalardan biridagi kokteyl barini ham ishlatadi.

Ma’lumot uchun, 2013 yilda Bruno Mars matbuotga bergan intervyusida birinchi marta 19 yoshida, hali mashhur qo‘shiqchi bo‘lishidan oldin kazinoga borganini aytgan.

“Birinchi o‘yinimni eslayman, qo‘llarim qaltirardi. Bir yigit buni payqab qolib, bundan foydalangan va 100 dollar yo‘qotganman”, degan xonanda.

Eslatib o‘tamiz, avvalroq taniqli xonanda Filipp Kirkorovning uchta bankdagi hisoblari sug‘urta qarzlari tufayli bloklangandi.
 

Rayhona Ulkanbayeva