Abdulla Oripov 1941-yil 21-martda Qashqadaryo viloyati Koson tumaniga qarashli Neko‘z qishlog‘ida tug‘ilgan. Toshkent davlat universitetining jurnalistika fakultetini tugatgan. O‘zbek adabiyotiga 1965-yilda «Mitti yulduz» she’riy to‘plami bilan kirib kelgan shoirning «Ko‘zlarim yo‘lingda» (1966), «Onajon» (1969), «Ruhim», «O‘zbekiston» (1971), «Xotirot», «Yurtim shamoli» (1974), «Yuzma-yuz», «Hayrat» (1979), «Najot qal’asi» (1981), «Yillar armoni» (1983), «Haj daftari», «Munojot» (1992), «Saylanma» (1996), «Dunyo» (1999), «Shoir yuragi» (2003) singari kitoblari nashr etilgan. «Sohibqiron»  she’riy dramasi respublikaning barcha yirik teatrlarida sahnalashtirilgan.

Dantening «Ilohiy komediya»sini, A. N. Nekrasov, L. Ukrainka, T. Shevchenko, R. Hamzatov, Q. Quliyev asarlarini o‘zbek tiliga tarjima qilgan. A. Oripov O‘zbekiston Respublikasi Davlat madhiyasining muallifi hamdir. Hamza hamda Alisher Navoiy nomidagi O‘zbekiston Respublikasi Davlat mukofotlari laureati.

Sen bahorni sog‘inmadingmi?

Uyg‘onguvchi bog‘larni kezdim,

Topay dedim qirdan izingni.

Yonog‘ingdan rang olgan dedim –

Lolazorga burdim yuzimni,

Uchratmadim ammo o‘zingni,

– Sen bahorni sog‘inmadingmi?

Uzoqlardan zarvorli tog‘lar,

Xayolimni keldilar bosib.

Kechdi qancha intizor chog‘lar,

Vasling menga bo‘lmadi nasib,

Sensiz men ham, bahor ham g‘arib,

– Sen bahorni sog‘inmadingmi?

Ungurlarda sakraydi ohu,

Na’matakda sa’va mittijon.

Qorliklardan sipqorilgan suv,

Daralarda uradi javlon.

Nigohimdan faqat sen pinhon,

– Sen bahorni sog‘inmadingmi?

Mana, bugun Navro‘zi olam,

Do‘stlarimga gullar tutarman.

Qaylardasan, suyukli erkam…

Qo‘limda gul seni kutarman,

Umrim bo‘yi chorlab o‘tarman:

– Sen bahorni sog‘inmadingmi?