Xizmatdan bo‘sh paytla­rida jismoniy tayyorgarlik va sport bilan shug‘ullanishadi, kitob mutolaa qilishadi. Jamoada «ustoz-shogirdlik» an’analari keng rivojlangan. Yosh xodimlarga tajribali harbiy xizmatchilar murabbiy etib tayinlanadi. 

Vzvod shaxsiy tarkibi har yili Ichki ishlar vazirligi hamda Qorovul qo‘shinlari miqyosida o‘tkazilayotgan sportning qo‘l jangi, boks, kurash va sambo turlari bo‘yicha musobaqalari, hamda «Dovyurak jang­chi» va «Alvon beret» kiyish huquqini berish sinovlarida ham faol qatnashib, bir qator yuksak natijalarga erishib kelmoqda.

Xususan, vzvod komandiri, kapitan Nurali Karimov 2022-yilda «Dovyurak jangchi» intensiv sinovlarda g‘olib bo‘lgan. Bundan tashqari, Qurolli Kuchlar miqyosida o‘tkazib kelinayotgan «O‘z kasbining ustasi» ko‘rik-tanlovida ham faol qatnashib, 2022–2023-yillarda tanlovning «Eng ilg‘or guruh komandiri» nominatsiyasida faxrli 3-o‘rinni egalladi.

Sportning qo‘l jangi turi bo‘yicha Qorovul qo‘shinlari qo‘mondoni kubogi musobaqasida katta leytenant Sirojiddin Oqqulov va oddiy askar Mahmud Murodov birinchi o‘rinni, kichik serjant Aydinbay Kenesbayev ikkinchi o‘rinni egallab, jamoaning faxriga aylandi. Hozirgi kungacha III darajali serjantlar S. Hamdamov, 

N. Achilov, kichik serjantlar A. Po‘latov, M. Xo‘ja­murodov, O. Rasulov, 

B. Shukurov «Dovyurak jangchi» nishonini olishga musharraf bo‘lishdi. Qolaversa, kichik serjantlar S. Ergashev va D. Tajiyev qo‘shin qo‘mondoni tashabbusi bilan joriy etilgan «Alvon beret» kiyish huquqini berish sinovlaridan o‘tishdi. Qorovul qo‘shinlari tashkil topgani­ning 25 yilligi munosabati bilan III darajali serjant Nosir Achilov «Qo‘shin a’lochisi» ko‘krak nishoni bilan taqdirlandi.

Qisqasi, mazkur harbiy qismning maxsus vazifalarni bajaruvchi safarbarlik vzvodida Vatanimiz bayrog‘ini yuksaklarga ko‘tarayotgan mard va jasur yigitlar xizmat qilmoqda. Shundaylar bor ekan, yurtimiz tinch, osmonimiz musaffo, hayotimiz yanada farovon bo‘laveradi. 

Elyor GAFFOROV,

podpolkovnik.

Buxoro viloyati.