Abdulaziz Yoʻldoshev/ 'Xalq soʻzi'. Samarqand viloyatida oʻtgan, 2023-yilda 'Ochiq byudjet' axborot portali orqali jamoatchilik fikri asosida shakllangan tadbirlarning ayrimlari haligacha toʻliq bajarilmagan. Bajarilganlarida ham ishning sifatsizligi va ajratilgan mablagʻlardan samarasiz foydalanish kabi holatlari aniqlandi.

Xususan, 'Yuksalish' harakati Samarqand viloyati boʻlinmasi bilan birgalikda jamoatchilik vakillari ishtirokida Samarqand viloyati hokimining 2023-yil 13-martdagi 83-7-0-Q/23-sonli qarori bilan tasdiqlangan 'Hududiy dastur'ning 118-bandida belgilangan 2023-yilda aholi tomonidan taklif berilgan suv, elektr energiyasi, yoʻl, maktab kabi yoʻnalishlar, shuningdek, mahallalar infratuzilmasini yaxshilash boʻyicha loyihalarni amalga oshirish, bunda, ajratilgan mablagʻlar va amalga oshirilgan ishlar yuzasidan jamoatchilik monitoringi amalga oshirildi.

Monitoring davomida Samarqand shahridagi 24-umumtaʼlim maktabida qurilish va taʼmirlash ishlarni amalga oshirish ishlari 'Ochiq byudjet' axborot portali orqali 2023-yilning 2 mavsumida boshlanishi belgilangan. Shu asosda maktab atrofini 600 metr devor bilan oʻrash, sport zal va faollar zallarida issiqlik tizimi oʻrnatish, boshlangʻich sinflar uchun 10 ochkoli hojatxona qurish, oshxona va omborxonada qoʻshimcha xonalar qurish, sport zalning kiyinish xonalarni taʼmirlash, maktab binosi fasad qismini taʼmirlash va hovlisida 500 m/kv plitka terish (quyosh panel oʻrnatish bilan) buyurtmachi tashkilot 'Yagona buyurtmachi xizmati' DUK va pudratchi tashkilot 'MINOR AGRO QURILISH MCHJ' tomonidan shartnoma boʻyicha loyiha qiymati 1 milliard 140 million soʻmlik ishlar bugungi kungacha toʻlaqonli topshirilmagan. Bajarilgan ishlarda ham kamchiliklar koʻpligi maʼlum boʻldi.

Xususan, loyihada maktab boshlangʻich sinflar uchun 10 ochkoli hojatxona qurish belgilangan boʻlsa-da, mablagʻ yetmaganligi sababli barpo etilmagan. Maktab oshxonasida oʻrnatilgan yangi isitish tizimi yaqindagina topshirilgan boʻlishiga qaramasdan plastmassa suv quvurlari qiyshayib qolgan. Bunga sabab issiq suv uchun moʻljallangan joyga sovuq suv uchun moʻljallangan plastmassa suv quvurlari oʻrnatib ketilgan.

' Shuningdek, taʼmirlash ishlar olib borilgan sinflarning devorlari mogʻorlab yotibdi. Isitish tizimlari turli oʻlchamlarda sifatsiz oʻrnatilgan, yoʻlaklarga terilgan plitkalar atrofi ochiq, issiq-sovuqda ochilib ketgan, ' deydi 'Yuksalish' harakati Samarqand viloyati boʻlinmasi rahbari Elyor Hamrayev. ' Katta umidlar bilan oʻrnatilgan koʻrinishidan yangi 2 ta qozonxona pechlari mutlaqo yaroqsiz, ulardan suv oqib yotibdi. Maktab oʻqituvchilari tomonidan 2, 3 marotaba payvandlab qoʻyilgan. Ammo foydasi boʻlmagan. Yaqindagina topshirilgan ushbu loyihada shuncha kamchiliklar. Vaholanki, loyiha qabul qilinayotganda mutasaddilarning hammasi risoladagidek, deyishganiga qanday qarash kerak?!

Samarqand shahridagi 35-umumtaʼlim maktabi hududini obodonlashtirish, asfalt qilish hamda sportzal binosida issiqlik tizimini va barcha sinf xonalarida zamonaviy eshik romlar hamda quyosh panellari oʻrnatish pudratchi tashkilot 'ABDUMANNON NUX-OQDARYO XK' korxonasi tomonidan 950,0 million soʻmlik loyiha doirasidagi ishlar 2023-yilning 2 mavsumida boshlangan boʻlsa-da, bugungi kungacha bu yumushlar toʻlaqonli topshirilmagan. Maktab oʻquvchilari bugungi yogʻingarchilik kunlarida maktab hovlisidagi loy kechib yuribdi.

' Shuningdek, maktab binosining hovli qismidagi gulxonalar atrofiga qoʻyilgan betonlar yorilib, yiqilish holatiga kelib qolgan, ' deydi Elyor Hamrayev. ' Binoga yangi oʻrnatilgan ayrim eshiklarning oynalari qoʻyilmagan, asosiy bino oldida loyiha boʻyicha qurilayotgan zinada nogironligi bor fuqarolar uchun pandos qurilmagan va ishlar hech qanday sabablarsiz choʻzib kelinmoqda.

Navbogʻchiyon MFYda joylashgan 73-umumtaʼlim maktabi hududidagi 2 ta transformatorning simyogʻochlari esa yaroqsiz boʻlib, avariya holatiga kelib qolgan. Maktab direktorining bildirishicha, ushbu holat yuzasidan koʻp marotaba shahar elektr tarmoqlari korxonasiga maʼlum qilingan. Afsuski, masʼullar bu holatga panja ortidan qarashda davom etmoqda.

Bundan tashqari Navbogʻchiyon MFYdagi Navbogʻchiyon-1, Gumbaz, Durdona, Uzumzor, Oʻzbekiston, Navbogʻchiyon, Ipakchi, Shohimardon va Boʻzi koʻchalariga 250 ta elektr beton ustunlar, 4 ta transformator va 20 000 metr elektr simlari oʻrnatish uchun 800,0 million soʻm shartnoma qiymati boʻyicha 'Ochiq byudjet' axborot portali orqali 2023-yilning 2 mavsumida gʻolib boʻlgan. Ushbu mahallada ishlar haligacha boshlanmagan.

Navbogʻchiyon MFYdagi elektr tarmoqlarining bugungi kundagi holati oʻrganilganida ushbu mahalla faollarining mazkur loyihaga jiddiy eʼtibor qaraganligi bejizga emasligini koʻrish mumkin.

Mahallaning qoq oʻrtasidan bir emas, ikki emas, uchta magistral, katta kuchlanishli simyogʻochlar oʻtgan. Ularning simlari aholining mevali daraxtlari shoxlariga tegib turibdi. Katta serqatnov yoʻl yoqasida esa hech qanday muhofaza qilinmagan 2 ta transformator bugungi kunda aholiga xizmat qilib kelmoqda. Juda ham achinarlisi shundaki, yoʻl yoqalaridagi simyogʻochlar eskirib koʻpchiligi xavfli koʻrinishga kelib qolgan.

Bulardan koʻrinib turibdiki, ushbu loyihalar yo oʻz ishining ustalariga topshirilmagan, yo mablagʻlar talon-taroj boʻlgan. Umid qilamizki, ushbu holatlarni tegishli tashkilotlar xolis oʻrganib, tegishli chora tadbirlar koʻriladi. 'Xalq soʻzi' bu mavzuga yana qaytadi.