Buxoro shahridagi olimpiya zaxiralari sport kollejida sportning barcha turi bo‘yicha har yili o‘nlab O‘zbekiston, Osiyo hamda jahon chempionlari yetishib chiqyapti. Ularning aksariyati ayni paytda yurt tinchligi, xalq farovonligini ta'minlash maqsadida osoyishtalik posboni bo‘lib xizmat qilib kelishmoqda. Viloyat IIB TVBSO 1-ishg‘ol qilish guruhi katta mutaxassis o‘qchisi, kichik serjant Ubaydullo Mo‘minov shulardan biridir.

U.Mo‘minov uch yildirki, shu lavozimda xizmat qiladi. U kollejda o‘qigan va murabbiylik qilgan paytlari sambo bo‘yicha besh marta respublika chempioni, jahon kubogida uchinchi o‘rin g‘olibi hamda bir necha turnirlar sovrindori bo‘lib, sport ustasi unvonini oldi. Shuningdek, ichki ishlar organlaridagi faoliyati davomida IIV kubogi musobaqalarida faol qatnashib, har yili faxrli o‘rinlarni egallab kelmoqda. O‘tgan yili Qirg‘iziston Respublikasining Issiqko‘l shahrida o‘tkazilgan sambo bo‘yicha jahon kubogida bronza medalni qo‘lga kiritdi. Kuni kecha Toshkent shahrida kattalar o‘rtasida o‘tkazilgan sambo bo‘yicha O‘zbekiston chempionatida 71 kg vazn toifasida birinchi o‘rinni egalladi.  

Lavha qahramoni g‘oliblik bilan birgalikda, 2024-yil iyul oyida Xitoyda bo‘lib o‘tadigan Osiyo chempionatida qatnashish uchun yo‘llanmani ham qo‘lga kiritdi. Ishonamizki, u Vatanimiz bayrog‘ini yana bir karra baland ko‘taradi. Biz unga “Bo‘sh kelma, Ubaydullo! G‘alaba hamisha yor bo‘lsin” deb qolamiz.  

Mirzoqul AHADOV,

o‘z muxbirimiz.

Buxoro viloyati.