IIV Madaniyat saroyida vazirlik markaziy apparati xodimlari bilan navbatdagi ma'naviyat va ma'rifat darsi bo'lib o'tdi. Unda so'zga chiqqan yuridik fanlari doktori, iste'fodagi polkovnik, Abdug'ofur Sattorov ichki ishlar organlari xodimlarining ma'naviy mezonlari xususida to'xtalib, bugungi kunda soha vakillariga xalqimizning ishonchi ortib borayotganligini qayd etdi. O'z navbatida xodimlar bu ishonchni oqlash, yanada mustahkamlash uchun o'z ustida tinimsiz ishlashi, doimo izlanishi, sohaga oid bilim va tajiribasini oshirib borishi, xizmat intizomi va qonuniylikka qat'iy rioya etishi lozimligini ta'kidladi.

Shuningdek, tadbir doirasida Ichki ishlar vazirining maslahatchisi, general-polkovnik Zokirjon Almatovning shonli hayot yo'li va xizmat faoliyatiga bag'ishlangan Unutilmas xotiralarim hamda Ustozga ehtirom nomli kitoblarning taqdimoti ham bo'lib o'tdi. Unda so'z olgan O'zbekistonda xizmat ko'rsatgan yurist, IIV Akademiyasi magistraturasi dotsenti, iste'fodagi polkovnik Alisher Sharafutdinov, Investitsiyalar va tashqi savdo vazirining maslahatchisi, filologiya fanlari doktori, professor Noibaxon Mamadaliyeva, IIV Faxriylar kengashi raisining o'rinbosari, iste'fodagi polkovnik Avaz Azizxodjayev mazkur kitoblarda Zokirjon Almatovning ibratli umr yo'li, uzoq yillik samarali xizmat faoliyati davomida boshidan o'tkazgan qiyinchiliklari, orttirgan boy amaliy tajribasi, tizim uchun ko'plab malakali shogirdlar yetishtirgani hamda mamlakatimiz hududida sodir etilgan qo'poruvchilik harakatlari va katta shov-shuvga sabab bo'lgan jinoyatlarni fosh etish, ularga qarshi kurashishda ko'rsatgan jasorati batafsil aks etganini aytishdi. Tadbir qatnashchilarda unutilmas taassurot qoldirdi.

Mixli SAFAROV,

o'z muxbirimiz.