Misol tariqasida aytadigan bo‘lsak, Nukus shahridagi ovqatlanish joylari­dan biriga kirgan fuqaro O.R. zarur ehtiyoj tufayli qisqa vaqtga tashqariga chiqadi. Qaytib kelganida esa stolda hujjatlari bilan birga qoldirgan «Samsung A-52» rusumli uyali telefoni yo‘qligini ko‘rib boshidan hushi uchdi. 

Holat yuzasidan Ichki ishlar bo‘limiga kelib tushgan murojaat bo‘yicha voqea joyiga yetib borgan guruh tarkibida kinologiya bo‘linmasi kichik inspektor-kinologi, safdor S.Sarsenbayev ham bor edi. Guvohlar topilavermagach, u o‘ziga biriktirilgan «Graf» laqabli xizmat iti bilan jinoyat joyidan qidiruvni boshladi. Natijasida ushbu o‘g‘irlikni Nukus shahrida yashovchi Ye.M sodir qilgani aniqlandi.

Shuningdek, Nukus tumani «Baqanshakli» OFYda yashovchi fuqaro A.A. Ichki ishlar bo‘limiga qilgan murojaatida kechasi uyidan velosipedini kimdir o‘g‘irlab ketganini ma’lum qildi. Voqea joyiga katta serjant J.Habibullayev o‘ziga biriktirilgan «Daroz» laqabli xizmat iti bilan chiqib, o‘g‘rilikni sodir etgan shaxsni topishga muvaffaq bo‘ldi. Aniqlanishicha, shu tumanda yashovchi K.A. mast holda jinoyatga qo‘l urgan ekan.

Bugungi kunda Qoraqalpog‘iston Respublikasi IIV JXX JTSB Kinologiya bo‘linmasi xodimlari hududlarda sodir bo‘lgan jinoyatlarni qisqa vaqtlarda fosh etishga munosib hissa qo‘shib kelmoqdalar. Xususan, o‘tgan yili 416 marta jinoyat joylariga chiqilib, 281 ta jinoyat xizmat itlari ishtirokida ochilishiga erishildi. 

Shuningdek, kinolog xodimlar tomonidan jamoat tartibini saqlash, xuquqbuzarlik va jinoyatlarning oldini olish maqsadida 1062 marta ko‘cha va jamoat joylarida, 184 marta bozorlarda piyoda patrullik naryadlari tashkillashtirilgan bo‘lsa, 350 marta ommaviy tadbirlarda xizmat olib borilgan. 

Hamkasblarimiz mamlakat miqyosida o‘tkazilayotgan ko‘rik-tanlovlarda faol ishtirok etib kelishmoqda. Jumladan, 2023-yilning 23–25-noyabr kunlari Buxoro viloyatida o‘tkazilgan «A’lochi kinolog» ko‘rik-tanlovida kinologiya bo‘linmasi kichik inspektor-kinologi, safdor Aydos Abdireymov sport to‘sinida tortilish mashqida faxrli uchinchi o‘rinni egallagan bo‘lsa, barcha shartlar bo‘yicha umumiy ko‘rsatkichlar jamlanganda jamoamiz ikkinchi o‘rinni qayd etib, medal va esdalik sovg‘alari bilan taqdirlandi. 

Sharapat UTEPOV, 

katta serjant.

Qoraqalpog‘iston Respublikasi.