“Al-Nasr” hujumchisi Krishtianu Ronaldu argentinalik futbolchi Lionel Messi to‘p suradigan “Inter Mayami” bilan o‘rtoqlik uchrashuvida maydonga tushmaydi. Bu haqda Saudiya klubi bosh murabbiyi Luish Kashtru ma’lum qildi.

Manbaga ko‘ra, Ronaldu hozirda jarohatidan tiklanishning so‘nggi bosqichini o‘tamoqda. Futbolchining jarohati “Al-Nasr”ning o‘tgan hafta Xitoyga safari chog‘ida ma’lum bo‘ldi. Shu sabab mamlakatda ikkita o‘rtoqlik uchrashuvi bekor qilindi.

O‘z navbatida Ronalduning jarohati bois, klubning Xitoydagi turnesi boshqa muddatga qoldirildi, bu esa xitoylik ishqibozlarning noroziligiga sabab bo‘ldi.

Ma’lumot uchun, “Al-Nasr”-“Inter Mayami” o‘yini bugun, 1 fevral kuni Toshkent vaqti bilan soat 23:00 da start oladi.