Bugun,  26 yanvar kuni O‘zbekiston Respublikasi Prezidenti Shavkat Mirziyoyev Qirg‘iz Respublikasi Prezidenti Sadir Japarov bilan telefon orqali muloqot qildi. Bu haqda Prezident matbuot xizmati xabar berdi.

Bildirilishicha, suhbat davomida O‘zbekiston bilan Qirg‘iziston o‘rtasidagi ko‘p qirrali hamkorlikni yanada rivojlantirish va kengaytirishning dolzarb masalalari ko‘rib chiqilgan.

Mamlakatlar hukumatlari, idoralari, hududlari va ishbilarmon doiralari o‘rtasida yaqin aloqalar va almashinuvlarni davom ettirish muhimligi ta’kidlangan.

“O‘zaro tovar ayirboshlash hajmini oshirish, avtomobilsozlik, elektrotexnika va to‘qimachilik tarmoqlarida, qishloq xo‘jaligi va boshqa ustuvor yo‘nalishlarda, shu jumladan qo‘shma Taraqqiyot fondi doirasida sanoat kooperatsiyasi loyihalarini ilgari surish bo‘yicha birgalikda amalga oshirilayotgan chora-tadbirlar qo‘llab-quvvatlandi”, deyiladi xabarda.

Shuningdek, Prezidentlar madaniy-gumanitar hamkorlik dasturini kengaytirishga alohida e’tibor qaratgan.

O‘zbekiston va Qirg‘iziston yetakchilari Markaziy Osiyo mintaqasidagi infratuzilmaviy loyihalarni amalga oshirish masalalarini muhokama qilgan, bo‘lajak uchrashuvlar rejasini ko‘rib chiqqan.