2022/23 yilgi mavsum yakunlari bo‘yicha Yevropaning eng daromadli klublari reytingida “Real Madrid” 1-o‘rinni egalladi. Tegishli reyting “Deloitte” xalqaro konsalting kompaniyasi tomonidan e’lon qilindi.

Manbaga ko‘ra, o‘tgan mavsum yakunlariga ko‘ra, “qirollik klubi” 831 million yevro ishlab topgan Shu tariqa, “qaymoqranglilar” 2017/18 yilgi mavsumdan buyon ilk bor dunyoning eng daromadli klubiga aylandi. 2-o‘rinda o‘tgan mavsumdagi trebl g‘olibi “Manchester Siti” (826 million yevro) qayd etildi. “Shaharliklar” o‘tgan mavsumda reytingda birinchi o‘rinni egallagandi. 3-o‘rinni esa PSJ (802 million) egalladi.

Umumiy hisobda, Yevropaning top-20 klubining daromadi 14 foizga oshib, 10,5 milliard yevroga yetdi. Tijorat daromadlari 2015/16 yildan beri birinchi marta translyatsiya tushumlaridan oshib, eng katta daromadga aylandi.

Eng daromadli klublar o‘nligiga, shuningdek, “Barselona” (800,1), “Manchester Yunayted” (745,8), “Bavariya” (744), “Liverpul” (682,9), “Tottenxem” (631,5), “Chelsi” (589,4) va “Arsenal” (532,6) kirdi.