Joriy yilning 14-yanvar kuni. Kechki soat 23:30. Havo harorati har kungidan-da sovuq. Yog‘ayotgan qor ko‘z ochib yumishga qo‘ymaydi. Ob-havoning ana shunday noqulay paytida Urganch tumanidagi Farxod ko‘chasidan o‘tuvchi kanal bo‘yida noma'lum kimsa mast holatda yurganini ko‘rgan fuqaro darhol “102” raqamiga qo‘ng‘iroq qildi. 

Navbatchilik qismi tezkor ma'lumotidan xabar topgan viloyat IIB JXX JTSB PPX batal'oni birinchi otryad safdor xodimi, safdor Dilshod Karimov hamda otryad haydovchi-xodimi, safdor Shavkat Otajonov zudlik bilan aytilgan manzilga yetib borishdi. Bu paytda fuqaro kanal ichida suvdan chiqolmay “Yordam beringlar!” deya tinimsiz qichqirardi. Xizmat avtomashinasidan tushgan safdor Dilshod Karimov shoshilgancha kanalga tushib, suvdan fuqaroni olib chiqa boshladi. Uning hamrohi esa “Tez yordam”ga xabar berdi. Fuqaro bilan o‘tkazilgan qisqa suhbatdan so‘ng u shu yaqin atrofda yashashi ma'lum bo‘ldi. Xodimlar darhol uni yashash xonadoniga olib borishdi. Shifokorlar esa birinchi tez tibbiy yordam ko‘rsatishdi.  

– To‘yda spirtli ichimlik iste'mol qilib, kayfim oshib qolibdi, – deydi urganchlik T. Alisher qilmishidan afsuslangancha. – Kanalga qanday tushib ketganimni eslolmayman. Muz yorilib, sovuq suvga tushib ketgach, o‘zimga keldim. Shundan so‘ng bir necha bor kanaldan chiqishga urindim. Ammo harakatlarim befoyda ketdi. Ko‘p o‘tmay oyoq-qo‘llarim uvishib, qimirlolmay qoldim. Atrofda biror kimsa ko‘rinmasa-da, yordam so‘rab qichqira boshladim. O‘z vaqtida ko‘rsatgan yordamingiz uchun sizlardan juda minnatdorman.

Shu tariqa PPX batal'oni xodimlari, safdorlar Dilshod Karimov hamda Shavkat Otajonovning hushyorligi hamda tezkor harakatlari tufayli mast holatda suvga tushib ketgan fuqaroning hayoti saqlab qolindi. 

Har bir sohaning o‘z fidoyilari, jonkuyarlari bo‘lgani singari PPX batal'onida ham g‘ayrat-shijoatli, kasbiga sadoqatli xodimlar ko‘pchilikni tashkil etadi. Lavhamiz qaxramonlari ham ana shunday fidoyilardan sanaladi. Ular bilan har qancha faxrlansak arziydi. 

Xudoybergan JABBOROV,

o‘z muxbirimiz.

Xorazm viloyati.