Namangan viloyatining Pop tumanida Rahimovlar oilasini ko‘pchilik yaxshi biladi. Umr yo‘ldoshi Gulshanoy opa bilan 5 nafar farzandni tarbiya­lab, kamolga yetkazgan Ne’matjon Rahimov hayotda o‘zidan yaxshi nom qoldirdi. U Pop tumani IIB HOOB voyaga yetmagan yoshlar orasida huquqbuzarliklarning oldini olish guruhi inspektori lavozimida xizmat qilib, hamkasblari orasida hurmat qozongan edi. 

Katta leytenant N.Rahimov 2006-yilning 30-may kuni xiz­mat olib borayotgan vaqtida jinoyatchi tomonidan yetkazilgan tan jarohati oqibatida halok bo‘lib, Prezidentimiz farmnoga ko‘ra, o‘limidan so‘ng «Jasorat» medali bilan taqdirlangan. 

Ne’matjon Rahimovning shonli yo‘lini farzandlari, shogirdlari davom ettirmoqda. 

To‘ng‘ich farzandlari Nizomjon va Nazirjon uzoq yillar yong‘in xavfsiz­ligi xizmatida faoliyat yuritib, pensiya­ga chiqqan. Uning yana bir o‘g‘li Ravshanjon esa hozirgi kunda Uchqo‘rg‘on tumani IIB JQB katta tezkor vakili lavozimida yurt osoyishtaligiga munosib hissa qo‘shib kelmoqda, unvoni mayor. 

2018-yilda IIV Akademiyasini tamomlagan uning kenja farzandi Mahmudjon Rahimov Namangan shahar IIOFMB huzuridagi Tergov bo‘limida tergovchi lavozimida faoliyat ko‘rsatmoqda. 

Marhum Ne’matjon Rahimovning yana bir o‘g‘li Rustamjon tadbirkorlik bilan shug‘ullanib, yurtimiz rav­naqiga o‘z hissasini qo‘shib kelmoqda. 

Nabiralari qurshovida keksalik gashtini surayotgan Gulshanoy aya farzandlarining kamolini, ular erisha­yotgan yutuqlarni ko‘rib quvonadi.

Sherzod ABDUSAMADOV,

o‘z muxbirimiz.

Namangan viloyati.