Ayni kunlarda respublika huquqni muhofaza qiluvchi organlar mas'ullaridan iborat ishchi guruh Jizzax viloyatida bo‘lib, joriy yilning 

27-oktabrida Oliy Majlis Qonunchilik palatasi va mahalliy kengashlar deputatligi uchun o‘tkaziladigan saylovlar, shuningdek, turarjoylar va ijtimoiy-iqtisodiy soha ob'ekt­larining kuz-qish mavsumiga tayyorgarlik jarayonlari bilan tanishyapti. Chunonchi, ishchi guruh tarkibida bo‘lgan Ichki ishlar vazirining o‘rinbosari, polkovnik Ramazon Ashropov saylov komissiyalari va uchastkalarida siyosiy tadbirni o‘tkazish uchun yaratilgan sharoitlarni o‘rganmoqda. 

Bunda asosiy e'tibor saylov arafasida hamda ovoz beriladigan kuni jamoat tartibi va yo‘l harakati xavfsizligini ta'minlash, mavjud 553 ta saylov uchastkasiga kuzatuv qurilmalarining o‘rnatilishi, aholini qiynayotgan muammolarni hal qilishga qaratilayotir. Ayni maqsadda viloyat ichki ishlar boshqarmasida hokimlik, sektorlar rahbarlari hamda huquqni muhofaza qiluvchi organlar mas'ullari va profilaktika inspektorlari ishtirokida yig‘ilish tashkil qilindi.

Yig‘ilishda saylovga tayyorgarlik ko‘rish, xavfsizlik va jamoat tartibini ta'minlash shtabi hamda joylarda tuzilgan ishchi guruhlar a'zolari va profilaktika inspektorlari tomonidan amalga oshirilishi lozim bo‘lgan chora-tadbirlarga to‘xtalib o‘tildi. Shuningdek, aholi turar joylari va ijtimoiy soha ob'ektlarini kuz-qishga tayyorlash, yonilg‘i-energiya resurslaridan foydalanish ustidan davlat nazoratini tashkil etish, energiya manbalari zaxiralarini yaratish, tabiiy va suyultirilgan gaz, ko‘mir va issiqlik energiyasini uzluksiz yetkazish masalalari ham ko‘rib chiqildi. 

Bundan tashqari, vazir o‘rinbosari iqtisodiyot tarmoqlari, ijtimoiy soha ob'ektlari va ko‘p kvartirali uy-joy fondini 2024–2025-yillar kuz-qish davriga tayyorlash ishlarini muvofiqlashtirish hududiy shtablari, ta'lim, sog‘liqni saqlash muassasalari hamda qozonxonalarda bo‘lib, qishga tayyorgarlik ishlari sifatini tekshirmoqda. O‘z navbatida, aniqlangan kamchiliklar bartaraf qilinayotir.

Alijon ABDUSATTOROV, 

o‘z muxbirimiz.

Jizzax viloyati.