Finlyandiya hukumati Davlat kengashining bugun, 11-yanvar kuni boʻlib oʻtgan umumiy yigʻilishida sharqiy chegaradagi cheklovlarni uzaytirishga qaror qildi. Bu haqda matbuot anjumanida ichki ishlar vaziri Mari Rantanen maʼlum qildi.

Unga endi cheklovlar shu yilning 11-fevraligacha amal qiladi.

'Milliy xavfsizlik Finlyandiya uchun muhim masala boʻlib qolmoqda', deydi Rantanen ushbu qarorni izohlab.

Ichki ishlar vazirligi rahbari hozirgi vaziyat Finlyandiyada yashovchi rossiyaliklar va ikki davlat pasporti egalariga salbiy taʼsir koʻrsatayotganini taʼkidladi.

Biroq, uning taʼkidlashicha, Rossiya tomonida hech qanday oʻzgarishlar boʻlmagan va gibrid taʼsir xavfi saqlanib qolmoqda. Rantanen Finlyandiya dekabr oyi oʻrtalarida ikkita nazorat-oʻtkazish punkti ochganini, biroq vaziyat oʻzgarmaganini eslatdi.

Finlyandiya hukumati milliy xavfsizlikni taʼminlash maqsadida oʻtgan yilning 16-noyabrida sharqiy chegaradagi ayrim nazorat-oʻtkazish punktlarini yopishga qaror qilgan edi. Bu chora tegishli hujjatlarsiz boshpana izlovchilar oqimini toʻxtata olmagan. Shundan soʻng, oʻtkazish punktlari soni kamaytirildi, keyin esa Vaynikkaladan tashqari butun chegara yopildi.

Shunga qaramay, hukumat oʻtgan yilning 14-dekabr kuni ikkita (Vaalima va Niirala) chegara punktini ochishga qaror qildi. Biroq, birinchi kunning oʻzidayoq Rossiyadan 100 dan ortiq boshpana soʻrovchilar kelgan. Shundan soʻng rasmiylar sharqiy chegarani bir oyga, 2024-yilning 14-yanvarigacha yopdi. Ichki ishlar vazirligi rahbari mamlakatga noqonuniy kirishga urinayotgan odamlar oqimi toʻxtagandagina vaziyat normallashishini aytdi.

Oldinroq, Finlyandiya vaziyat normallashganidan keyin Rossiya bilan chegarani bosqichma-bosqich ochishini maʼlum qilgandi.

Bungacha Yevropa Ittifoqining tashqi chegara xavfsizligi agentligi 'Frontex' Rossiya bilan chegara nazoratini kuchaytirish uchun Finlyandiyaga xodimlarini yuborgani, ular mamlakat sharqiy chegaralarida ikki oydan koʻproq vaqt davomida qolishi maʼlum boʻlgandi.