Viloyat IIB XTTB JXB JTSG inspektori Minal Qambarova 1995-yil Termiz shahrida tug‘ilgan. Ziyoli o‘qituvchi oilasida tarbiya olgan Minal Termiz davlat universiteti xorijiy filologiya fakultetini tamomlagan. Ichki ishlar organlarida 2020-yildan beri faoliyat olib bormoqda. 

Minal yosh xodim bo‘lishiga qaramay, turli tadbirlarda ham juda faol. U “Zakovat” o‘yinlarining viloyat IIB jamoasi a'zosi sifatida doimiy qatnashchisi. Qolaversa, huquq-tartibot idoralari yosh xodimlari o‘rtasida o‘tkazilgan tanlovlar, xususan, 2023-yilda Samarqandda o‘tkazilgan “To‘maris izdoshlari” ko‘rik-tanlovining faol ishtirokchisi. Buning uchun bir necha marotaba viloyat IIB hamda XTTB rahbariyati tomonidan rag‘batlantirilgan. 

Termiz tumanida joylashgan Fayoztepa tarixiy yodgorligiga tashrif buyurgan 4 nafar germaniyalik sayyoh yo‘lidan adashib qoladi. XTTB navbatchilik qismiga shu holat bo‘yicha xabar kelib tushgach, katta leytenant Minal Qambarova Fayoztepaga borib, sayyohlar bilan suhbatlashib, ularga temiryo‘l vokzalidan chipta sotib olishlariga ko‘maklashib, Toshkent shahriga kuzatib qo‘yadi. 

Minal Qambarova yo‘ldan adashib qolgan, buyumlarini yo‘qotib qo‘ygan sayyohlarga yaqindan yordam berib kelmoqda. O‘z kasbini sevib, har bir vazifani sidqidildan ado etib kelayotgan yosh xodima kasbdoshlari orasida ham hurmat qozongan.

U ingliz hamda rus tilini mukammal bilgani uchun ushbu tillarda jahon adabiyotining durdona asarlarini sevib mutolaa qiladi. Ayniqsa, Lev Tolstoy romanlarini o‘zgacha ishtiyoq bilan o‘qiydi. Hozirda u S1 sertifikatini olish uchun tayyorgarlik ko‘rmoqda. 

– Afsonalarga ko‘ra qadimda Minal ismli afsonaviy qahramon ayol yashagan va u o‘z qavmi uchun katta fidoyilik ko‘rsatgan. Ismimni esa ana shu afsonaviy qahramon ayolga mengzab qo‘yishgan. Meni ham u singari Vataniga, o‘z xalqiga sadoqatli inson bo‘lishimni istashgan bo‘lishsa, ajab emas. Zero, tanlagan kasbim ayni fazilatlarni taqozo etadi. 2024-yilning “Yoshlar va biznesni qo‘llab-quvvatlash yili” deb e'lon qilingani ham biz yoshlarni barcha jabhada faol bo‘lishga undaydi. Men ham bunday qo‘llab-quvvatlovdan mamnun holda izlanishda davom etaman. 

Feruza RAHMONQULOVA,

o‘z muxbirimiz.

Surxondaryo viloyati.