Kecha, 8 yanvar kuni Saudiya Arabistoni valiahd shahzodasi, Bosh vazir Muhammad bin Salmon Ol Saud AQSH Davlat kotibi Entoni Blinkenni Al-Ula shahridagi qishki dam olish maskanida qabul qildi. Bu haqda Blinken o‘zining X'dagi sahifasida ma’lum qildi. 

“U bilan G‘azodagi gumanitar ehtiyojlarni zudlik bilan hal qilish va mojaroning yanada tarqalishining oldini olish muhimligini muhokama qildik”, deb yozadi Blinken.

Davlat departamenti tomonidan e’lon qilingan bayonotga ko‘ra, AQSH Davlat kotibi va Saudiya valiahd shahzodasi mintaqaviy taranglikni pasaytirish, jumladan, Qizil dengizdagi tijoriy yuk tashishga husiylar hujumlarining oldini olish bo‘yicha olib borilayotgan sa’y-harakatlarni muhokama qilgan. 

“Davlat kotibi Blinken yanada xavfsiz, farovon va integratsiyalashgan mintaqani, jumladan, mustaqil Falastin davlatini barpo etish orqali yaratish muhimligini ta’kidladi. Shuningdek, AQSH va Saudiya Arabistoni o‘rtasidagi strategik hamkorlikning ahamiyati muhokama qilindi”, deyiladi bayonotda.

Saudiya Arabistonining rasmiy SPA axborot agentligining yozishicha, Muhammad bin Salmon va Entoni Blinken suhbat chog‘ida ikki tomonlama munosabatlar va ikki davlat manfaati yo‘lida hamkorlikni rivojlantirish masalasini ko‘rib chiqqan. 

“Valiahd shahzoda harbiy amaliyotlarni to‘xtatish, insonparvarlik harakatlarini faollashtirish, barqarorlikni tiklash va Falastin xalqining qonuniy huquqlariga ega bo‘lishini hamda adolatli va mustahkam tinchlikka erishish uchun shart-sharoitlar yaratishga intilish muhimligini ta’kidladi”, deyiladi xabarda.

Uchrashuvda Saudiya Arabistonining AQSHdagi elchisi malika Rima bint Bandar Ol Saud, Ar-Riyod viloyati gubernatori o‘rinbosari shahzoda Muhammad bin Abdulrahmon Ol Saud, Milliy gvardiya vaziri shahzoda Abdulloh bin Bandar Ol Saud, Tashqi ishlar vaziri shahzoda Faysal bin Farxon Ol Saud, Madaniyat vaziri shahzoda Badr bin Abdulloh Ol Saud, Davlat vaziri va milliy xavfsizlik maslahatchisi doktor Musaid bin Muhammad Al-Aybon, shuningdek, AQSHning Qirollikdagi elchisi Maykl Ratni va uning hamrohligidagi delegatsiya ishtirok etgan. 

Blinken Saudiyaga safari davomida matbuot uchun chiqish ham qilgan va bor yo‘g‘i ikkita savolga javob bergan. 

U Isroil va Livan hukumatlari, shuningdek, “Hizbulloh” ham mojaroning kuchayishidan qochayotganini, Vashington esa buni diplomatiya orqali hal qilishga urinayotganini bildirgan. 

“Ma’lumki, keskinlashuv, haqiqiy mojaro hech kimning: Isroil, Livan va “Hizbulloh”ning manfaatiga mos emas. Va Isroil tomoni bizga diplomatik yo‘l bilan bundan keyin ham taraqqiyotni xohlashini aytdi. Bu isroilliklarga xavfsiz uyga qaytish imkonini beradi. Deyarli 100 ming isroillik Livandagi “Hizbulloh” tahdidi tufayli Shimoliy Isroildagi uylarini tark etishga majbur bo‘ldi”, deydi Blinken.

Davlat kotibining so‘zlariga ko‘ra, hozir gap “livanliklarning ham mamlakat janubiy qismidagi uylariga qaytishiga” imkon beradigan kelishuvlarga erishish imkoniyati haqida ketmoqda. 

Blinken Saudiya Arabistoniga borishdan oldin Abu Dabiga ham qo‘nib o‘tgan. AQSH Davlat kotibi u yerda Birlashgan Arab Amirliklari Prezidenti Shayx Muhammad bin Zoid Ol Nahayon bilan uchrashib, mintaqadagi mojaroning kengayishiga yo‘l qo‘ymaslik va G‘azodagi gumanitar ehtiyojlarni hal qilish borasidagi sa’y-harakatlarni muhokama qilgan. 

“Mustaqil Falastin davlatini barpo etish yo‘lida harakat qilyapmiz”, deb yozgan Blinken X ijtimoiy tarmog‘ida.

Biroq uning BAAga safari maxfiy ravishda o‘tkazilgan.

Shunday qilib, Blinken G‘azoda urush boshlangandan beri mintaqaga qilgan to‘rtinchi safari davomida Turkiya, Gretsiya, Iordaniya, Qatar, BAA va Saudiya Arabistonida bo‘ldi. U bugun, 9 yanvar kuni Isroilga borib, u yerdagi rasmiylar bilan uchrashadi. Bundan tashqari, Blinken G‘arbiy Sohilga ham borishi rejalashtirilgan. Uning Yaqin Sharqqa safari esa Misr bilan yakunlanadi.

Eslatib o‘tamiz, 7 yanvar kuni Saudiya Arabistoni valiahd shahzodasi, Bosh vazir Muhammad bin Salmon Ol Saud Al-Ula shahridagi qishki qarorgohida Lindsi Grem va boshqa amerikalik senatorlarni qabul qilgandi.