Foto: Akmal Muhammadov / “Xalq so‘zi”

2023 йил 28 ноябрь куни Тошкент шаҳрида Олий Мажлис Сенати томонидан БМТ Аҳолишунослик жамғармасининг (ЮНФПА) ваколатхонаси, «Оила ва хотин-қизлар» илмий-тадқиқот институти билан ҳамкорликда ташкил этилган халқаро конференция ўз ишини бошлади.

Икки кун давом этадиган конференция ишида БМТнинг Аҳолишунослик жамғармаси раҳбарлари, ЮНИСEФ жамғармаси, Жаҳон соғлиқни сақлаш ташкилоти, Аҳолишунослик ва тараққиёт бўйича парламент аъзоларининг Осиё форуми каби халқаро ташкилотлар вакиллари, Жаҳон банки, Осиё тараққиёт банки, қарийб 20 давлатдан 40 дан ортиқ парламент ва ҳукумат вакиллари иштирок этмоқда.

Халқаро конференция мавзуси -– Демографик ўзгаришлар шароитида жамиятни барқарор ривожлантириш: миллий ва хорижий тажриба.

Анжуманнинг асосий мақсади демографик ўзгаришлар оқибатида таълим, соғлиқни сақлаш, меҳнат бозори, урбанизация соҳаларида юзага келадиган муаммолар ва уларнинг оқилона ечими ҳақида тавсиялар ишлаб чиқишдан иборат.

Шунингдек, конференция ишида муваффақиятли стратегиялар ва ечимлар намойиш этилади, инклюзив ва далилларга асосланган самарали ечимлар ишлаб чиқиш бўйича тажриба алмашинмоқда.

Халқаро конференцияни Олий Мажлис Сенати Раиси Т.Нарбаева кириш сўзи билан очар экан, анжуман кун тартибидаги барча масалалар долзарб эканлигини қайд этди. Бу масалалар нафақат Ўзбекистон учун, балки барча мамлакатлар учун ҳам долзарб эканини, айрим давлатларнинг аҳолиси ўсиши нуқтаи назаридан, баъзи мамлакатларнинг эса аҳолиси қисқариб бориши нуқтаи назаридан тегишли чоралар кўриб бориш даркорлигини таъкидлаб ўтди. Мамлакатимизда тобора ўсиб бораётган аҳоли учун ҳам иқтисодий имкониятлар яратиш, ҳам ижтимоий ҳимоя кафолатларини таъминлаш борасидаги ишлар давлат томонидан жадал олиб борилмоқда. Шу мақсадда Ўзбекистонда кейинги йиллардаги кенг ислоҳотлар доирасида «Инсон қадри учун» деган тамойил асосида мақсадли чора-тадбирлар амалга ошириляпти.

БМТнинг Аҳолишунослик жамғармаси ижрочи директори Наталия Канем видеомурожаатида кўрилаётган масалалар, улардан келиб чиқадиган хулосалар Ўзбекистонда амалга оширилаётган демографик барқарор ривожланишни таъминлашга хизмат қилишини айтиб ўтди.

Анжуман иши «Демографик барқарорлик ва барқарор ривожланиш: чақириқлар ва имкониятлар», «Демографик барқарорлик ва инсон капитали: ўзгаришларга мослашиш ва имкониятлардан фойдаланиш» ҳамда «Ўзбекистонда соғлом ва узоқ умр кўриш ўн йиллиги» мавзуларидаги учта сессия доирасида ташкил этилди.

Биринчи сессия давомида демографик барқарор ривожланиш учун иқтисодий имкониятлар яратиш, хусусан аҳолини уй-жой билан таъминлаш, ходимларнинг меҳнат ҳуқуқлари ва эркинликларини таъминлаш, меҳнат соҳасида ижтимоий шерикликни ривожлантириш бўйича энг яхши амалиётлар муҳокама қилинди.

Куннинг иккинчи ярмида давом этган сессияларда демографик ўзгаришлар шароитида инсон капиталини ривожлантириш, аҳолининг ижтимоий ҳимоясини кучайтириш, таълим, соғлиқни сақлаш соҳасида ислоҳотларни изчил давом эттириш каби масалалар иштирокчилар эътиборида бўлди.

Конференция эртага, 29 ноябрь куни ўз ишини давом эттиради.

 Foto: Akmal Muhammadov / “Xalq so‘zi”