Adliya vazirligida davlat organlari va tashkilotlari xodimlari uchun “Qonun loyihalarini tayyorlash, Vazirlar Mahkamasiga kiritish, Qonunchilik palatasi va Senat yigʻilishlarida himoya qilish” mavzusida oʻquv-seminari tashkil qilindi.

Oʻquv-seminarda Oliy Majlis palatalari, Hukumat va 30 dan ortiq davlat organlari vakillari ishtirok etishdi.

Ceminarda taʼkidlanishicha mustaqillik yillaridan buyon oʻtgan davr mobaynida Adliya vazirligi tomonidan 30 mingdan ortiq normativ-huquqiy hujjatlar davlat hisobiga olingan boʻlsa, shundan 8 mingga yaqini, yaʼni deyarli 30 foizi soʻnggi besh yil davomida qabul qilingan.

Qonunchilik palatasi vakillari tomonidan qonun loyihalarini palatada koʻrib chiqish tartibi hamda loyihalarni kiritishda eʼtibor qaratish lozim boʻlgan jihatlarga batafsil toʻxtatib oʻtildi. Xususan, toʻgʻridan-toʻgʻri amal qiladigan qonun loyihalarini ishlab chiqish, muayyan sohani tartibga solishga qaratilgan bir nechta qonun oʻrniga yaxlit kodeks ishlab chiqish lozimligi qayd etildi.

Oliy Majlis Senatida qonun loyihalarini koʻrib chiqish tartibi va loyihalarni ishlab chiqishda bugungi kunda koʻp uchrayotgan kamchilik va muammolar toʻgʻrisida Senat vakillari batafsil tushuntirish berib oʻtdi.

Seminarda normativ-huquqiy hujjatlarni ishlab chiqish va qabul qilish jarayonlari raqamlashtirilganligiga alohida toʻxtalib, xususan bugungi kunda loyihalarni ishlab chiqish va kelishish –Project.gov.uz orqali hamda ularni jamoatchilik muhokamasidan oʻtkazish – regulation.gov.uz orqali amalga oshirilmoqda.

Norma ijodkorligi jarayonida qonunchilik hujjatlari va loyihalarni tartibga solish taʼsirini baholashdan oʻtkazish tizimi joriy etilgan boʻlib, birgina 2022-yilda 144 ta qonunchilik hujjati loyihasining taʼsiri baholanib, ulardan 150 dan ortiq talab, majburiyat va cheklov oʻrnatuvchi norma chiqarib tashlandi. Natijada aholi va tadbirkorlik subyektlari uchun 7 trln soʻmdan ortiq asossiz xarajatlarning oldi olindi.

Shuningdek, 2026-yilga qadar 21 mingdan ortiq hujjatni korrupsiyaga qarshi ekspertizadan oʻtkazish belgilangan. 2022-yilda ushbu yoʻnalishda 1800 dan ortiq hujjat ekspertizadan oʻtkazilib, ularning 12 foizida 300 dan ziyod korrupsiyaviy omillar aniqlandi hamda ularni bartaraf etish boʻyicha tegishli qonunchilik hujjati loyihalari ishlab chiqildi.

Shuningdek, seminarda vazirlik masʼullari tomonidan qonun loyihalarini ishlab chiqish va huquqiy ekspertizadan oʻtkazish tartibi toʻgʻrisida batafsil tushuntirish berib oʻtildi.

Bundan tashqari, norma ijodkorligi jarayonida kelgusida rejalashtirilayotgan ishlar muhokama qilindi, unga koʻra norma ijodkorligida “aqlli tartibga solish” modeli keng joriy etish orqali hujjatlarning samaradorligi oʻrganiladi hamda hujjatining maqsadlariga erishilganligi va samaradorligini aniqlash maqsadida hujjatning taʼsiri baholanadi.

Kelgusida, qonunchilik hujjatlarini har yili Hukumat tomonidan tasdiqlanadigan rejalashtirish dasturlari asosida ishlab chiqiladi. Qonunchilik bazasini yanada ixchamlashtirish va aniq sohalar kesimida tizimlashtirish maqsadida 57 ta sohada 10 mingga yaqin qonunchilik hujjatlari tizimlashtiriladi.