Foto: “Xalq soʻzi”

U ichki bozor raqobatiga dosh bera oladimi?

Fargʻona viloyatining Toshloq tumanidagi “Yoshlar” kichik sanoat zonasida yaqinda ish boshlagan “Ice milk bif” MCHJ tomonidan ishlab chiqarilayotgan keng assortimentdagi muzqaymoqlar tobora xaridorgir boʻlib bormoqda.

Ayni paytda korxonaning sifatli va hamyonbop salqin mahsulotlari butun mamlakatimiz boʻylab savdo tarmoqlari, supermarketlarga yetkazib berilayotir. Ayniqsa, bugungi yozning jazirama kunlarida muzqaymoqqa boʻlgan talab va ehtiyoj har qachongidan ham yuqori. Buni inobatga olgan holda korxona sexlarida qadoqlanayotgan muzqaymoqlar peshma-pesh savdo nuqtalariga yetkazilyapti.

— Istiqbolli loyihani amalga oshirish uchun Xitoydan 6 mlrd soʻmlik zamonaviy uskunalar olib kelib oʻrnatildi,— deydi tadbirkor Fazliddin Dadajonov. — Natijada 30 ta yangi ish oʻrni ochildi, buyurtmachilar talabiga mos 10 turdagi muzqaymoq tayyorlanmoqda. Biz ichki bozorda raqobatga dosh berib, xaridorlar ishonchini qozonishga intilamiz. Bu oson boʻlmaydi, chunki oʻz brendiga ega salqin mahsulot ishlab chiqaruvchilar safi tobora kengayib bormoqda.

Hozirgi kunda “Yoshlar” kichik sanoat zonasida 80 sotix yerda samarali faoliyat koʻrsatayotgan yosh tadbirkor yaqin istiqbolda loyiha doirasida qoʻshimcha tarmoqlarni ishga tushirishni maqsad qilgan. Buning natijasida kelgusida toshloqlik 60 nafar yigit-qizning bandligi taʼminlanadi.

— Tadbirkorlikda zamonaviy yondashuv, innovatsiya, marketing ishlarini toʻgʻri yoʻlga qoʻyish muhim ahamiyatga ega, — deydi F. Dadajonov. — Ayni jihatlarni inobatga olib, yaqin va uzoq muddatli biznes-loyihalarni ishlab chiqqanmiz. Maqsadimiz – xalqimiz didiga mos va xushtaʼm muzqaymoqlar tayyorlashga qaratilgan.

Taʼkidlash oʻrinliki, joriy yilning birgina may oyida korxonada 60 tonna muzqaymoq tayyorlanib, ulgurji narxlarda xaridorlarga yetkazildi va shu hisobdan 200 mln soʻm daromad olindi.

Botir MADIYOROV, “Xalq soʻzi”.