Foto: «Xalq so‘zi»

Muddatidan ilgari Prezident saylovini o‘tkazuvchi 6-Namangan saylov okrugining navbatdagi yig‘ilishida xalq deputatlari tuman va shahar Kengashlarining navbatdagi sessiyalari tomonidan uchastka saylov komissiyalari tarkibiga tavsiya etilgan nomzodlar ko‘rib chiqildi. Ayni yo‘nalishda komissiya a’zolari tomonidan taqdim etilgan axborotlarga ko‘ra, uchastka saylov komissiyalari tarkibidagi 7412 nafar nomzodlarning 3315 nafari erkaklar va 4097 nafari ayollardan iborat. Ularning 70 foizi oliy, 27 foizi o‘rta-maxsus ma’lumotga ega. Shuningdek, nomzodlarning 6349 nafari, ya’ni, 86 foizi avvalgi saylovlarda faol ishtirok etgan.

Faoliyati bo‘yicha olib qaralganda nomzodlarining asosiy qismini xalq ta’limi xodimlari tashkil etadi.Qolganlari oliy ta’lim va davlat idoralari, o‘zini-o‘zi boshqarish organlari, nodavlat notijorat tashkilotlarida ishlovchilardan iborat. Ularning ko‘pchiligi jarayonlar haqida yetarli tushunchaga ega huquqshunoslar, shifokorlar, muhandislar, iqtisodchilar, pedagoglar va boshqa soha xodimlari, xorijiy tillarni biladigan mutaxassislar hisoblanadi.

Yig‘ilishda okrug saylov komissiyasining uchastka saylov komissiyalari tarkibini tasdiqlash to‘g‘risidagi qarori qabul qilindi.

Qudratilla NAJMIDDINOV, “Xalq so‘zi”.