2023-yilning 25-may kuni Oʻzbekiston Respublikasi Hukumati nomidan Investitsiyalar, sanoat va savdo vazirligi, “Air Products” kompaniyasi va “Oʻzbekneftgaz” AJ oʻrtasida “Air Products” kompaniyasi tomonidan 1 mlrd dollarlik investitsiya evaziga Qashqadaryo viloyatidagi tabiiy gazni qayta ishlash qurilmasini rivojlantirish boʻyicha Investitsiya shartnomasi imzolandi.

Tabiiy gazni qayta ishlash sanoat majmuasi dunyodagi eng zamonaviy energetika korxonalaridan biri boʻlgan “Uzbekistan GTL” zavodining ajralmas qismi boʻlib, yiliga 1,5 million tonna yuqori qoʻshimcha qiymatga ega sintetik suyuq yoqilgʻi ishlab chiqaradi va kelajakda ichki isteʼmol va eksportga yoʻnaltiradi.

Maʼlumot uchun: 2021-yil 25-dekabr kuni Qashqadaryo viloyatining Gʻuzor tumanida sintetik suyuq yoqilgʻi ishlab chiqaruvchi “Uzbekistan GTL” majmuasi ishga tushirilgan edi. Ushbu majmua dunyoda beshinchi hisoblanadi. Bungacha Qatar, Nigeriya, Janubiy Afrika va Malayziyada ham shunday yirik majmualar qurilgan.

“Air Products” direktorlar kengashi raisi, prezidenti va bosh direktori Seyfi Gasem shartnomani quyidagicha sharhladi: “Oʻsish surʼati yuqori boʻlgan mamlakat – Oʻzbekistonda ushbu strategik hamkorlik orqali biz eng ilgʻor texnologiyalar va bilimlarimizni qoʻllash imkoniyatiga ega boʻlamiz. Bu kelishuv yuqori sifatli arzon yoqilgʻi ishlab chiqarish va oʻsib borayotgan ijtimoiy ehtiyojlarni qondirish imkonini beradi. Biz ushbu uzoq muddatli va barqaror sheriklikni rivojlanishini kutmoqdamiz, shuningdek, Oʻzbekiston bilan hamkorlik imkoniyatlaridan mamnunmiz.

Marosimda taʼkidlanganidek, “Air Products” kompaniyasi tajribasidan “Uzbekistan GTL” zavodida — tabiiy gazni chuqur qayta ishlash asosida yuqori qoʻshimcha qiymatli mahsulotlar ishlab chiqarishda foydalanish orqali samaradorlik oshiriladi, mahsulot tannarxi pasaytiriladi va zararli chiqindilarni kamaytirishga erishiladi.