Amerikaning Time jurnali muharrirlari “Yil odami – 2021” uchun o‘z tanlovini e’lon qildi. Ular SpaceX va Tesla kompaniyasining rahbari, dunyodagi eng boy odam Ilon Maskni ushbu e’tirofga loyiq deb topdi. Tanlov translyatsiyasi nashrning YouTube kanalida berilgan.

Time’da ta’kidlanishicha, Mask boshqaradigan mashinani uning o‘zi yaratgan, bu mashinaga haydovchining deyarli keragi yo‘q. Shuningdek, “birgina barmoq silkish bilan” u fond bozoriga va Mars haqidagi orzularga ta’sir o‘tkazishi mumkin.

“Bu odam Yer sayyorasidagi, kelajakda, ehtimol, undan tashqaridagi hayotga favqulodda ta’sir ko‘rsatadi. Iqlim o‘zgarishining ekzistensial inqirozidan, tengsizlik muammolaridan tortib yangi imkoniyatlar chegaralargacha — hech kim bu yilgi mavzularni 2021-yil odami Ilon Maskdan yaxshiroq o‘zida mujassam etmagan”, — deya e’lon qildi jurnalning bosh muharriri Edvard Felzental.

2021-yilda Mask tarixda boyligi 300 milliard dollardan oshgan ilk milliarderga aylandi.

1927-yildan beri har yili Time “Yil odami”ni e’lon qiladi.

Jurnal talqini bo‘yicha Barak Obama (2012-yil), Rim Papasi Fransisk (2013), Ebola bilan kurashuvchilar (2014), Angela Merkel (2015), Donald Tramp (2016), ta’qiblar haqida xabar bergan odamlar (2017), “haqiqatni himoya qiluvchi” jurnalistlar (2018), Greta Tunberg (2019), Jo Bayden va Kamala Xarris (2020) ushbu e’tirofga sazovor bo‘lgan.

Avvalroq Time jurnali tomonidan o‘quvchilar orasida o‘tkazilgan so‘rovnomada 24 foiz ovoz bilan Braziliya prezidenti Jair Bolsonaru yil odami deb topilgandi.