Foto: "Xalq so‘zi"

Namangan davlat universitetiga Yevropa Ittifoqining O‘zbekistondagi elchisi Sharlotta Adrian tashrif buyurdi.

Elchi universitetda tashrif davomida so‘nggi yillarda olib borilayotgan akademik va ilmiy ishlar, «Erasmus+ dasturi» loyihalari natijalari, fakultetlar faoliyati, ularda talabalar uchun yaratilgan sharoitlar bilan yaqindan tanishdi.

Shundan so‘ng yangi tashkil etilgan biotexnologiya fakulteti laboratoriyalaridagi mashg‘ulotlar jarayonini bevosita kuzatib, talabalar bilan suhbatlashdi.

Yangi tashkil etilgan IT-PARK, axborot resurs markazi ham Sharlotta xonimda iliq taassurot qoldirdi. Universitet professor-o‘qituvchilari bilan ham qizg‘in suhbatlashgan elchi bu yerda ilmiy yutuqlar uchun mustahkam poydevor mavjudligini eʼtirof etdi.

Taʼkidlash o‘rinliki, ayni paytda Namangan davlat universiteti Polsha, Ruminiya, Gretsiya, Italiya va Portugaliyaning bir qator nufuzli OTMlari bilan o‘zaro hamkorlik shartnomalari imzolangan. Hozirga qadar  yuzga yaqin professor-o‘qituvchi va talabalar almashinuv dasturlarida ishtirok etganlar. “Aymep”, “Uzdok”, “Modehed” kabi 3 yillik loyihalar muvaffaqiyatli amalga oshirilgan. Mehmonali Egamberdiyev, Otabek Imomov, Saidjalol Hasanov, Jasur Isroilov, Asatullo Sulaymonov, Mirzohid Askarov, Botir Jafarov, Olimjon Dadaboyev, Dilmurod Mahmudjanov kabi yosh o‘qituvchilar Polsha, Italiya, Ruminiya kabi davlatlardagi nufuzli OTMlarda akademik almashinuv bo‘yicha ilmiy izlanishlar olib borib, ularning aksariyati hozirda falsafa doktori  dissertatsiyalarini muvaffaqiyatli himoya qilganlar.

Muloqotda ular tomonidan o‘quv jarayonida qo‘llanilayotgan Yevropa tajribalari, kredit-modul tizimida tadbiq etilayotgan metodlar xususida Sharlotta Adrianga batafsil maʼlumot berdilar.

Elchi Namangan davlat universitetida olib borilayotgan ishlarni yuksak baholadi va kelgusida bu kabi hamkorlik davom etishini mamnuniyat bilan taʼkidladi.