AQSh sobiq prezidenti Barak Obama 4-avgust kuni 60 yoshga to‘ldi, biroq u dam olish kunlarida o‘tkaziladigan yubiley tadbirini rejalashtirganidan kamroq odamlar bilan o‘tkazadi. Bu haqda Obama ofisiga tayanib, Associated Press xabar qilgan.

“‘Delta’ shtammi tarqala boshlagani tufayli sobiq prezident va uning rafiqasi tadbirni tor doirada o‘tkazishga qaror qildi, tug‘ilgan kun munosabati bilan o‘tkaziladigan bazmda faqat oila a’zolari hamda Obamalar oilasining yaqin do‘stlari ishtirok etadi”, – deyiladi Obama matbuot kotibi Hanna Hankinsning bayonotida.

Obamaning matbuot kotibi tadbirni o‘tjazish bo‘yicha rejalar tuzish bir necha oy oldin boshlangani va barchasi sog‘liqni saqlash sohasi tavsiyalari asosida tashkillashtirilishi ko‘zda tutilganini, ammo endi vaziyat o‘zgarib ketganini qayd etgan.

“Sobiq prezident Obama unga tavallud kuni munosabati bilan tabriklar yo‘llaganlarga minnatdorlik bildiradi va tez kunlarda masofadan turib uni tabriklagan tanishlari bilan uchrashish baxti nasib qilishiga umid qilmoqda”, – deya qo‘shimcha qilgan Hankins.

Avval Obamaning tug‘ilgan kunini Martas-Vinyard orolida katta tantana bilan nishonlamoqchi ekani xabar qilingandi. The Hill bergan ma’lumotlarga ko‘ra bazmga o‘nlab taniqli odamlar, xususan, mashhur amerikalik teleboshlovchi Opra Uinfri ham kelishi kutilayotgandi. Axios portali tug‘ilgan kun bazmiga qariyb 500 nafar mehmon chaqirilishi mumkinligi haqida yozgan.

Ushbu ma’lumotlar OAVda tarqala boshlagach, ushbu tashkilotchilik ishlari tanqid ostiga olingan. Amerikalik konservativ jamoat faoli va yozuvchi Charli Kerk “AQSh kasalliklar nazorati va profilaktikasi markazlarining (CDC) Obamaga bazmni bekor qilishni tavsiya qilmayaptimi, demak ularning sizga tegishli korxonani yopish uchun bergan tavsiyalariga ham rioya etmaslik kerak”, – deya koronavirus sabab vaqtincha faoliyati to‘xtatilayotganiga munosabat bildirgan.

Avval Oq uy AQShning amaldagi prezidenti Jo Baydenning Delaver shtatidagi Rexobot-Bich shahriga tashrifi borligi sababli bazmda ishtirok etmasligini ma’lum qilgandi.

Barak Obama AQShnig 44-prezidenti. U Oq uyda ikkita prezidentlik muddatini o‘tkazgan, ya’ni 2009 – 2017-yillarda mamlakatga rahbarlik qilgan. Bayden Obama prezidentligi davrida vitse-prezident lavozimida ishlagan va uning asosiy maslakdoshlaridan biri edi.