Niderlandiyaning qalin piyoz dalalarini yoritayotgan nur gollandiyalik rassom va dizayner Daan Ruzegardning yangi san’at namunasi hisoblanadi. Daan Ruzegard piyozning ikki yillik turi ekilgan maydonga bir vaqtning o‘zida ham estetik zavq beradigan, ham ekinlar uchun amaliy foyda bo‘ladigan vertikal ravishda porlovchi qizil, ko‘k hamda ultrabinafsha chiroqlarni installyatsiya yordamida (ya’ni kompyuterga maxsus dastur o‘rnatish orqali) joylashtirib chiqdi.

Bu kompozitsiya chiroyli ko‘rinish bilan birgalikda, daladagi piyozlarning o‘sishini tezlashtirib beradi va kimyoviy moddalardan foydalanishga hojat qoldirmaydi.

Ilm-fan va san’at birlashishidan yana ham go‘zal dunyo yaratishni ko‘zlagan loyiha muallifi “Ushbu landshaftga jonli san’at asari sifatida qarash orqali endi  ‘qishloq xo‘jaligi’ so‘ziga yangi ma’no beriladi”, deb aytib o‘tdi.

20 ming kvadrat metr maydonni o‘z ichiga olgan ushbu loyihaga fitobiologik texnologiyalardan foydalangan holda taxminan ikki yil vaqt sarflandi. Quyida siz ushbu go‘zallik muhrlangan fotosuratlar va video tasvir bilan tanishasiz.