Adabiyot bo‘yicha Nobel mukofotiga amerikalik shoira Luiza Glyuk munosib deb topildi

Nobel qo‘mitasi adabiyot bo‘yicha 2020-yildagi mukofot sohibi nomini e’lon qildi. Mukofotga amerikalik shoira Luiza Glyuk munosib deb topildi. Bu haqda Meduza xabar berdi.

Foto: Twitter / @NobelPrize

Mukofot “o‘zining ashaddiy go‘zalligi bilan individual mavjudlikni umumbashariy qiladigan, bexato taniladigan she’riy ovoz uchun” berildi.

2019-yildagi marosimda Shvetsiya akademiyasi birdaniga ikki yil uchun mukofot egalari nomlarini e’lon qilgan — ular polshalik Olga Tokarchuk va avstriyalik Peter Xandke bo‘lgan. 2018-yilda adabiyot bo‘yicha mukofot topshirish g‘oliblar haqidagi ma’lumotlarning sizib chiqishi bilan bog‘liq mojaro sababli bekor qilingan.

Osloda 9-oktabr kuni tinchlik uchun Nobel mukofoti sohibining nomi ma’lum qilinadi. 12-oktabr kuni esa iqtisodiyot yo‘nalishida kim mukofotni qo‘lga kiritgani ma’lum bo‘ladi. Bunga qadar tibbiyot, fizika va kimyo bo‘yicha Nobel mukofotining 2020-yildagi sohiblari nomi ma’lum qilingandi.