Avval xabar berganimizdek, bugun 25-avgust kuni Oʻzbekiston musulmonlari idorasida Ichki nazorat komissiyasi tomonidan xalq orasida “Isoqjon domla” deb tanilgan Toshkent shahridagi “Imom Termiziy” jome masjidi imom-xatibi Isoqjon Begmatovning ijtimoiy tarmoqlardagi bir qator chiqishlari keng muhokama qilindi.

Komissiya aʼzolari tomonidan imom-xatibning turli bahs-munozaralarga sabab boʻlgan hissiyotga berilib qilgan keskin chiqishlari, ulamolar fatvolariga nisbatan ayrim teskari fikrlari, ixtilofli masalalarni koʻtarishi oqibatida, nizo va qarama-qarshiliklarga sabab boʻlgani qattiq tanqid ostiga olindi.

Ichki nazorat komissiyasi avval ham ushbu imom-xatibning mana shunday chiqishlarini bir necha bor koʻrib chiqib, uni jiddiy ogohlantirgan edi. Afsuski, bunday holatlar yana takrorlanishda davom etdi.

Yigʻilishda I.Begmatovning mazkur chiqishlari Oʻzbekiston musulmonlari idorasi munosabatini mutlaqo ifoda etmasligi, balki uning oʻzbilarmonlik ila aytgan shaxsiy fikr-mulohazalari ekani taʼkidlandi.

I.Begmatov ijtimoiy tarmoqlarda muhokamaga sabab boʻlgan chiqishlarida jiddiy xatoga yoʻl qoʻyganini eʼtirof etdi va pushaymonligini bildirdi.

Ichki nazorat komissiyasi qaroriga asosan imom-xatib mazkur chiqishlarida ushbu yoʻnalishdagi buyruqlar talablari, ichki tartib-qoidalari hamda mehnat majburiyatlariga muntazam ravishda rioya etmagani uchun Isoqjon Begmatov Toshkent shahridagi “Imom Termiziy” jome masjidi imom-xatibi vazifasidan ozod etildi.

Maʼlumot oʻrnida, Oʻzbekiston musulmonlari idorasida tuzilgan Ichki nazorat komissiyasi diniy soha xodimlari faoliyatini tartibga solish, kamchiliklarga yoʻl qoʻyganlarga taʼsir choralarini qoʻllash va halol-pok xizmat qilayotganlarni ragʻbatlantirish kabi vakolatlarga egadir.