1832-1838-yillarda Xiva xoni Olloqulixon davrida qurilgan Toshhovli saroyi konservatsiya va restavratsiya qilindi

Xivadagi Toshhovli saroyi 1832-1838-yillarda Xiva xoni Olloqulixonning amri bilan qurilgan. Bu saroy Xivadagi ikkinchi Ark, xonning qasri sifatida barpo etilgan. Toshhovli saroyi haram, mehmonxona, arzxona hovlilaridan iborat. Haramda xonning oilasi yashagan boʻlsa, mehmonxonada xorijdan kelgan elchilar qabul qilingan, arzxonada fuqaroning arz-dodi tinglangan. Xiva shahrining 2500-yillik yubileyi oʻtkazilishi munosabati bilan 1997-yilda Toshhovlida qisman taʼmirlash, tiklash ishlari olib borilgan.

Yaqinda Toshhovli saroyini konservatsiya va restavratsiya qilish loyihasi AQSH Davlat departamentining Madaniy merosni asrab-avaylash jamgʻarmasi (AFCP) koʻmagida amalga oshirildi. Mahalliy usta kulollar tomonidan saroyning bezakli koshinlari qayta tiklandi. Ushbu tarixiy obidada aks ettirilgan badiiy elementlar aynan Xivaga xos boʻlib, ular boshqa joyda uchramaydi.

Toshhovli saroyida konservatsiya va restavratsiya ishlari tugashi munosabati bilan AQSHning Oʻzbekistondagi favqulodda va muxtor elchisi Jonatan Xenik qadimiy Ichanqalʼa majmuasida boʻldi, xorazmlik mohir kulollar, yogʻoch va marmar oʻymakor ustalari hamda xattotlar mehnatining mahsuli boʻlgan, xalqimizning koʻp asrlik madaniyati va anʼanalarini oʻzida aks ettirgan tarixiy obidalarga yuksak baho berdi.

                                                      Odilbek Odamboyev,

                                                              “Xalq soʻzi”.