Jahon sogʻliqni saqlash tashkiloti maʼlumotlariga koʻra, dunyoda yiliga oʻrtacha 2,5 million odam OITS infeksiyasini yuqtirib, ularning qariyb 1 million nafari kasallik tufayli hayotdan koʻz yumadi.

Shuni inobatga olgan holda yurtimizda OIV infeksiyasini profilaktika qilish, tashxis qoʻyish va davolash sifatini oshirish muhim. Xususan, joriy yil 20-yanvar sanasida qabul qilingan “Odamning immunitet tanqisligi virusi keltirib chiqaradigan kasallikka qarshi kurashish tizimini yanada kuchaytirish chora-tadbirlari toʻgʻrisida”gi Prezident qarorida ham bu borada amalga oshirilishi lozim boʻlgan muhim vazifalar oʻrin olgan.

Jumladan, aholi orasida OIV infeksiyasini aniqlash boʻyicha tekshiruvlar qamrovini oshirish, bemorlarga sifatli tibbiy va ruhiy-ijtimoiy yordam koʻrsatish, ularni zarur dori vositalari bilan toʻliq taʼminlash hamda ijtimoiy himoyasini kuchaytirish kabilar shular jumlasidan.

Hujjat bilan tasdiqlangan strategiyaga muvofiq, 2023-2027-yillarda mutaxassislarning bilim va koʻnikmalarini oshirish, keng targʻibot ishlarini oʻtkazish ham koʻzda tutilgan.

Qarorda belgilangan vazifalardan kelib chiqqan holda OIV infeksiyasi bilan yashovchi shaxslarni davolash, parvarish qilish va qoʻllab-quvvatlash masalalari boʻyicha Respublika oʻrta tibbiyot va farmatsevtika xodimlari malakasini oshirish va ularni ixtisoslashtirish markazi hamda Oʻzbekiston hamshiralar assotsiatsiyasi hamkorligida Assotsiatsiya raisi, uning hududiy boʻlinmalari rahbarlari 18 soatlik maxsus kursda oʻqitildi.

“OIV infeksiyasi bilan yashovchi shaxslarga palliativ yordam koʻrsatish” mavzusidagi kurslardan koʻzlangan asosiy maqsad oʻrta tibbiyot xodimlarida mazkur virus va unga qarshi turish boʻyicha zamonaviy bilim, koʻnikma va malakalarni shakllantirish, kasallikni aniqlashga yordam beradigan kompleks fikrlashni rivojlantirishdan iborat.