Foto: Xalq so‘zi

Kuni kecha Fransiyaning “Orano Mining” kompaniyasidan bir guruh mutaxassislar «Navoiyuran» DKga xizmat safari bilan kelgani haqida xabar bergan edik. Bugun kompaniya vakillari jurnalistlar bilan muloqotda dastlabki taassurotlarini bayon etishdi.

Bertran Oliver Mari KVINIU, “Orano Mining” kompaniyasi texnologik jarayonlar boʻyicha mutaxassisi:

— Oʻzbekiston Respublikasi Prezidentining oʻtgan yil kuzida Fransiya Respublikasiga rasmiy tashrifi doirasida erishilgan kelishuvlarga koʻra, “Orano Mining” kompaniyasi «Navoiyuran» DK bilan keng hamkorlikni yoʻlga qoʻyish belgilandi. Shu maqsadda bizning bir guruh mutaxassislardan iborat delegatsiyamiz «Navoiyuran» DKda boʻlib turibdi. Biz oʻzimizning sohamizga oid har bir yoʻnalish boʻyicha maʼlumotlarni oʻrganish ishlarini olib boryapmiz. Bundan maqsad ishlab chiqarishni kengaytirish va uran ishlab chiqarishni klaster darajasiga yetkazishdan iborat. Oʻrganishlardan keyin qoʻshma hisobotlar qilinadi va bu hisobotlar natijasida rivojlanish chora-tadbirlari hamda strategik “yoʻl xaritasi” ishlab chiqiladi.

Yana bir muhim jihatga eʼtiboringizni qaratishingizni istar edik. Bundan besh yil oldin Oʻzbekistonga, aynan shu korxonaga tashrif buyurganimda bu yerga kirish yoki maʼlumot olish, oʻrganish mutlaqo mumkin boʻlmagan edi. Buning oqibatida esa biz qariyb hech qanday taassurotlarsiz ortga qaytgandik. Bu galgi tashrifimizdan shuni koʻrib turibmanki, hamma sharoitlar yaratilgan, xorijiy hamkorlar bilan keng hamkorlik qilish uchun yoʻllar ochilgan va biz bundan juda ham mamnunmiz. Buning natijasida shaxsan oʻzim ishlab chiqarish, geologiya-qidiruv jarayonlarini va konchilik sohasidagi amaliyotlar bilan tanishishga imkonim boʻldi.

Andreas MITTLER, “Orano Mining” kompaniyasi togʻ-kon sanoati boʻyicha katta eksperti:

- “Orano Mining” kompaniyasi faoliyati «Navoiyuran» DK bilan bir yoʻnalishda boʻlgani uchun ham oʻzaro hamkorlik qilish har jihatdan manfaatli va, albatta, juda qiziqarli deb oʻylayman. Bizning bu yerda mahalliy mutaxassislardan oʻrganadigan jihatlarimiz juda koʻpligiga amin boʻlyapman. Biz nafaqat oʻzimizning kompaniyada orttirgan tajribamizni, balki jahonning bir nechta mamlakatlari, xususan, Qozogʻiston va Mongoliyada shu yoʻnalishda olib borayotgan tajribamizni ham qoʻllab, oʻz fikrlarimiz bilan oʻrtoqlashamiz. Bizni hayratga solayotgan yana bir narsa shuki, konlar murakkab geografik-iqlim sharoitida joylashgan boʻlishi qaramasdan, uranni qazib olishda yuqori natijalarga erishilayotganligi quvonarlidir. Bunday qiyinchiliklarga va ob-havo injiqlariga qaramasdan, birgalikda uran ishlab chiqarish darajasini ikki barobarga yetkazishni maqsad qilib qoʻyganmiz. Bu natijaga erishish uchun konchilik hamda geologiya-qidiruv ishlarini raqamlashtirishni rejalashtirganmiz. Men ishonamanki, biz birgalikda fikrlashgan holda hamkorlikda bu ishlarni amalga oshira olamiz va oʻz xulosalarimizni beramiz. Albatta, xalqaro tajriba va tavsiyalarimiz har ikki tomonga ham foydali boʻladi.

Temur ESHBOYEV, “Xalq soʻzi”.