Foto: Xalq so‘zi

Samarqand shahridagi “Ishga marhamat” monomarkazida bugungi kunda yigirmadan ortiq kasbiy taʼlim yoʻnalishida ishsiz fuqarolar oʻz qiziqishi boʻyicha oʻqitilib, tegishli sertifikatga ega boʻlmoqda. Eʼtiborlisi, tinglovchilarni ish bilan taʼminlash masalasi ham eʼtibordan chetda qolayotgani yoʻq. Shu kungacha monomarkaz bitiruvchilarining 90 foizi bandligi taʼminlangani, yuzdan ortiq korxona-tashkilotga hamkorlik shartnomasi asosida mutaxassislar yetkazib berilgani buning dalilidir.

Mehnat bozorini oʻrganishlar shuni koʻrsatmoqdaki, asosan ayollar sartaroshi, tikuvchi, payvandchi, elektr tarmogʻi muhandisi, avtomobillarga texnik xizmat koʻrsatish, issiqxona texnologiyasi, zargarlik, kosmetolog, qandolatchi va oshpazlarga talab katta boʻlmoqda. Monomarkazda mutaxassislar tayyorlashda bu jihat inobatga olinayotir.

Shuningdek, oʻquv mashgʻulotlarini sifatli tashkil etish uchun xalqaro hamkorlik masalalariga ham alohida eʼtibor qaratilyapti. Xususan, shu kunlarda Koreya Respublikasining Global Service-Learning KEIMYUNG COLLAGE universiteti professor-oʻqituvchilari va talabalari Samarqanddagi ushbu markazda boʻlib turibdi.

Markazda koreyalik mutaxassislar birinchi tibbiy yordam koʻrsatish, oshpazlik hamda sartaroshlik kasblari boʻyicha mahorat darslarini olib bormoqdalar.

Abdulaziz Yoʻldoshev, “Xalq soʻzi”.