Qrimdagi portlash sababi ochiqlandi

Rossiya tomonidan anneksiya qilingan Qrim yarimorolining Jankoy tumanidagi harbiy omborda o'q-dorilarning portlashi qo'poruvchilik tufayli sodir bo'lgan. Bu haqda Rossiya Mudofaa vazirligi xabar bergan.
"Bugun, 16 avgust kuni ertalab qo'poruvchilik oqibatida Jankoy qishlog'i yaqinidagi harbiy omborga zarar yetdi", deyiladi xabarda.
Shu bilan birga, vazirlik hyech kim jiddiy jarohat olmaganini qo'shimcha qilgan. Biroq, fuqarolik obʻyektlariga: elektr uzatish liniyalariga, elektr stantsiyalariga, temir yo'llarga va turar-joy binolariga zarar yetgan. Qo'poruvchilik oqibatlarini bartaraf etish bo'yicha zarur choralar ko'rilmoqda.
Eslatib o'tamiz, bugun, 16 avgust kuni Moskva vaqti bilan taxminan 06:15 da Mayskoye (Jankoy tumani) aholi punkti hududida o'q-dorilarni vaqtincha saqlash uchun ajratilgan uchastka hududida yong'in sodir bo'ldi. Yong'in oqibatida saqlanayotgan o'q-dorilar portlab ketdi.
Qrim rahbari Sergey Aksyonovning aytishicha, ikki nafar tinch aholi yengil va o'rtacha og'irlikdagi yaralangan. Hodisa sodir bo'lgan hudud o'rab olingan, u yerdan ikki mingga yaqin odam evakuatsiya qilingan.
O'q-dorilarning portlash paytida temir yo'l relslari shikastlangan, bu esa yettita yo'lovchi poyezdini kechiktirgan. Rels allaqachon tiklangan, ammo barcha xavfsizlik choralari ko'rilgandan keyingina harakat tiklanadi.
Aytish joizki, 9 avgust kuni Rossiya tomonidan anneksiya qilingan Qrim yarimorolining Novofedorovka posyolkasidagi "Saki" harbiy aviabazasida ketma-ket portlashlar sodir bo'ldi. Rossiya samolyotlari Zaporojye, Nikolayev va Xerson viloyatlarini bombardimon qilish uchun aynan shu havo bazasidan foydalanayotgandi.
Ukraina Mudofaa vazirligi portlashlarga izoh berib, yong'in sabablarini aniqlay olmaganini taʻkidlab o'tdi.
Rossiya Mudofaa vazirligining maʻlum qilishicha, portlashlar o'q-dorilarning o'z-o'zidan portlashi tufayli sodir bo'lgan. Jarohatlanganlar va bir kishi halok bo'lgani haqida xabarlar bor. 14 kishi jabrlangan.
"The Waшington Post" nashri Ukraina rasmiysiga tayanib, Qrimdagi aerodromga Ukraina maxsus kuchlari zarba berganini xabar qildi.
Rossiya-Ukraina urushi
Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o'zini mustaqil deb eʻlon qilgan Lugansk xalq respublikasi (LXR) va Donetsk xalq respublikasini (DXR) tan olish to'g'risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini taʻkidlab, Ukrainaga qarshi urush xavfini oshirib yubordi.
Putinning favqulodda qarori ortidan AQSh, EI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanktsiyalar kiritdi.
24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini eʻlon qildi va rus qo'shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so'rov yuborgani bilan oqladi.
Bundan avvalroq Zelenskiy Rossiya fuqarolariga rus tilida murojaat qilib, ukrainlarga "na sovuq, na issiq, na gibrid urush kerak emas"ligini, ukrainlar hujumchilarni kutib olishga tayyorligini bildirgandi. Ko'p o'tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat eʻlon qildi.
25 fevral kuni Zelenskiy Ukrainada umumiy harbiy safarbarlik eʻlon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.
Rus qo'shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.
Ukrainaga hujum boshlanishi Rossiya iqtisodiga og'ir zarba berdi. Rus kompaniyalari aktsiyalari keskin arzonlashdi, Moskva birjasida savdolar mislsiz darajada pasayish bilan o'tdi. Gazprom, LUKOYL va boshqa yirik kompaniyalar yo'qotishlarga uchradi.
Hujum boshlangach, Evropa davlatlari va AQSh Rossiyaga qarshi bir necha bosqichli sanktsiyalar joriy qildi. Rossiyaning VTB, "Rossiya" banki, "Otkritiya", "Novikombank", "Promsvyazbank", "Sovkombank" va VEB.RF banklari SWIFT xalqaro banklararo tizimidan uzildi. AQSh va Evropa Ittifoqi Rossiyaning oltin-valyuta zaxirasini blokladi.
Evropa davlatlari, AQSh, Kanada Rossiya uchun o'z havo hududini yopdi. Bu sanktsiyalarga neytral davlat hisoblangan Shveytsariya ham qo'shildi. Urush fonida Ukrainani Evropa Ittifoqi aʻzoligiga qabul qilish jarayoni tezlashdi.