«Yangi O'zbekiston – inson qadri ulug'langan yurt» shiori ostida viloyatda o'tkazilayotgan «Maʻnaviyat festivali» doirasida Samarqand shahridagi 36-sonli maktabgacha taʻlim tashkilotida «Zukko Bolajon» fotoalbomi taqdimotiga bag'ishlangan badiiy-musiqali bayram tadbiri tashkil etildi.

Tadbirda poytaxtimizdan kelgan bir guruh ijodkorlar, olimlar, sanʻatkorlar hamda "Maʻrifat" targ'ibotchilar jamiyati aʻzolari ishtirok etdi.

- Maʻnaviy-maʻrifiy sohadagi islohotlar, o'zgarishlarni eng quyi bosqich – maktabgacha taʻlim tashkilotidan boshlasakkina kutilgan natijaga erishamiz, - dedi Prezidentning yoshlar, fan, taʻlim, sog'liqni saqlash, madaniyat va sport masalalari bo'yicha maslahatchisi o'rinbosari Nodirjon Xolbo'tayev. - Zero, davlatimiz rahbari taʻbiri bilan aytganda «Har bir bola – bamisoli o'sib, kuchga to'layotgan, parvarishga muhtoj nozik nihol. Binobarin, uni hyech qachon mehr va eʻtibordan chetda qoldirib bo'lmaydi.

Ushbu «Zukko Bolajon!» fotoalbomi respublika Maʻnaviyat va maʻrifat markazi, Maktabgacha taʻlim vazirligi, «Maʻrifat» targ'ibotchilar jamiyati hamkorligida tayyorlangan.

Tadbirda falsafa fanlari doktori, professor Jamila Shermuhammedova, Toshkent irrigatsiya va qishloq xo'jaligini mexanizatsiyalash instituti professori Zuhra Ismoilova, O'zbekiston Yozuvchilar uyushmasi aʻzosi, shoira Sayyora To'ychiyeva so'zga chiqib, bolajonlarga samimiy tilaklarini bildirdi. Ular bugungi kunda mamlakatimizda farzandlarimiz manfaatlarini himoya qilish, ularning jahon andozalariga muvofiq bilim olishi uchun yaratilayotgan shart-sharoitlar haqida alohida to'xtaldi.

Tadbir davomida "Zukko Bolajon!" fotoalbomi 36-sonli maktabgacha taʻlim muassasasiga topshirildi.

Tadbirda sahnaga bolajonlar taklif etildi, ular bolalikni tarannum etuvchi kuy-qo'shiqlar hamda «Samarqand qizlari», «Andijon polkasi» nomli sho'x raqslar bilan ishtirokchilar kayfiyatini ko'tardi.

Shuningdek, tadbir davomida soha xodimlari uchun shuʻbalarga bo'lingan holda bola tarbiyasi hamda uning maʻnaviy kamoloti xususida seminar-trening o'tkazildi.

«Zukko Bolajon!» loyihasi doirasida fotoko'rgazma hamda Samarqand qo'g'irchoq teatri tomonidan tomoshalar namoyish etildi. Kulolchilikka qiziqishi bo'lgan bolalar uchun darslar tashkil qilindi.