Buxoroda “Xalqaro zardo‘zlik, zargarlik va kashtachilik san’ati” festivali yakunlandi

Buxoroda besh kun davom etishi rejalashtirilgan “Xalqaro zardo‘zlik, zargarlik va kashtachilik san’ati” festivali to‘rtinchi kuni yakunlandi. Festivalning taqdirlash va yopilish marosimi “Ark” qo‘rg‘oni maydonida bo‘lib o‘tdi, deya xabar bermoqda “Daryo” muxbiri.

Yopilish marosimida ikki ming nafardan ortiq tomoshabin, 150 dan ziyod mahalliy va xorijiy ommaviy axborot vositalari xodimlari,  AQSH, Rossiya, Angliya, Yangi Zelandiya, Kuvayt, Tojikiston, Malayziya, Indoneziya kabi davlatlardan kelgan xorijlik mehmonlar va hunarmandlar ishtirok etgan.

Tantanada viloyat hokimi Botir Zaripov so‘zga chiqib, o‘z tabrigida Buxoro san’ati shoh asari hisoblangan “Shashmaqom” YUNESKOning umuminsoniy nomoddiy madaniy merosi ro‘yxatiga kiritilganini e’lon qilgan.

Festivalda qatnashgan mahalliy va xorijiy hunarmandlarning qo‘l mehnatlari yetti kishidan iborat xalqaro hay’at tomonidan baholab borilgan. G‘oliblar “Eng yaxshi zargarlik tashkiloti”, “Eng yaxshi zardo‘zlik tashkiloti”, “Eng yaxshi zardo‘z”, “Eng yaxshi zargar”, “Eng yaxshi zardo‘zlik maktabi ustasi”, “Zardo‘zlik bo‘yicha qadimiy sulola davomchisi”, “Zargarlik bo‘yicha qadimiy sulola davomchisi” kabi 40 dan ortiq nominatsiyalar bo‘yicha taqdirlangan. Ularga diplom va pul mukofotlari topshirilgan.

Shundan so‘ng xonandalar hamda O‘zbekiston davlat filarmoniyasining raqqos va raqqosalari chiqishi namoyish etilgan.