So‘nggi kunlarda mamlakat yo‘llarida sodir bo‘lgan yo‘l-transport hodisalari tafsilotlarini taqdim etamiz.

Niva piyodani urib ketdi

Sharof Rashidov tumani “Yaxtanlik” mahalla fuqarolar yig‘inida yo‘l-transport hodisasi ro‘y berdi. Tumanning “Saroylik” mahallasida istiqomat qiluvchi shaxs boshqaruvidagi Niva bilan yo‘l chekkasida harakatlanayotgan piyodani urib yubordi.

Oqibatda “Taraqqiyot” mahalla fuqarolar yig‘inida istiqomat qiladigan jabrlanuvchi bosh miya jarohati bilan shifoxonaga yotqizilgan. Holat yuzasidan tergovga qadar tekshiruv o‘tkazilmoqda.

Zominda Nexia urib ketishi oqibatida piyoda shifoxonaga joylashtirildi

Zomin tumani “O‘zbekiston” mahalla fuqarolar yig‘ini hududidan o‘tuvchi Dashtobod—Zomin 4-R yo‘lining birinchi kilometrida tumanning “Chorvador” qishloq fuqarolar yig‘inida yashovchi shaxs boshqaruvidagi Nexia bilan yo‘lni kesib o‘tayotgan piyodani urib yubordi.

Oqibatda “O‘zbekiston” mahalla fuqarolar yig‘inida istiqomat qiladigan jabrlanuvchi bosh miya lat yeyishi og‘ir darajasi, miya komasi, ikkala oyoq sidirilgan jarohati, travmatik shok og‘ir darajasi tashxisi bilan shifoxonaning jonlantirish bo‘limiga yotqizilgan. Holat yuzasidan tergovga qadar tekshiruv o‘tkazilmoqda.

Sharof Rashidov tumanida Nexia ag‘darilishi oqibatida bir kishi vafot etdi

Sharof Rashidov tumani “Xayrobod” mahalla fuqarolar yig‘inidan o‘tuvchi Toshkent—Termiz M-39 yo‘lining 997-kilometrida yo‘l-transport hodisasi ro‘y berdi. Samarqand viloyati Ishtixon tumani “Buloqboshi” mahalla fuqarolar yig‘inida yashovchi shaxs ixtiyoridagi Nexia boshqaruvini yo‘qotdi va avtoulov yo‘l chetiga ag‘darildi.

Oqibatda salonda bo‘lgan yo‘lovchi, Samarqand viloyati Ishtixon tumani “Fayzobod” mahalla fuqarolar yig‘inida istiqomat qilgan shaxs tan jarohatlari olib, voqea joyida vafot etgan. Yana bir yo‘lovchi, Samarqand viloyati Past Darg‘om tumani “Chimyobot” mahalla fuqarolar yig‘inida yashovchi fuqaro o‘ng jag‘ sohasining yopiq sinishi tashxisi bilan shifoxonaga yotqizildi.