Surxondaryo viloyatining Termiz tumanidagi Otchopar mavzesida viloyatning Navro‘z tantanalari bo‘lib o‘tdi. “Daryo” bayram tadbirdagi eng qiziq lahzalarni fotokamera xotirasiga muhrladi.

Tadbirda viloyat hokimi To‘ra Bobolov, Tojikiston Respublikasining Tursunzoda shahri, Shahrinav va Hisor tumanlari hamda Xatlon viloyatining Shahrituz va Nosir Xusrav tumani raislari boshchiligidagi Tojikiston delegatsiyasi, shuningdek, Qoraqalpog‘iston Respublikasi Taxiatosh tumani hokimi boshchiligida bir guruh faollar va yoshlar ham ishtirok etdi.

Bayram tadbirida viloyatdagi mavjud tuman va shahar hokimliklari tomonidan maxsus pavilyonlar tashkil etilib, o‘sha tumanga xos urf-odatlar ko‘rsatib berildi.

Viloyatning asosiy bayram tadbirida poytaxtdan kelgan san’atkorlar — Mahmud Namozov, Hosila Rahimova, Lola Ahmedova, Shahnoza Otaboyeva hamda Dilafro‘z Hayitmetovalar kuylab, surxondaryoliklar kayfiyatini ko‘tardi.

Bayramda kurash musobaqasi ham tashkil etilib, bosh sovrin 100 million so‘m pul mukofoti uchun murosasiz bahslar bo‘lib o‘tdi. Kurashda sho‘rchilik Bekmurod Oltiboyev 1-o‘rinni qo‘lga kiritib, 100 million so‘m pul mukofotiga ega chiqqan bo‘lsa, denovlik Shohrux Mahmarasulov 2-o‘rinni olib 20 million so‘mga, uzunlik Zohid Husainov va denovlik Yahyo Imomovlar esa 3-o‘rinni qo‘lga kiritib, har biri 10 million so‘mlik pul mukofotiga ega bo‘ldi.

Bayram munosabati bilan Termiz shahar hokimligi homiyligida ijtimoiy himoyaga muhtoj, kam ta’minlangan o‘ndan ortiq oila farzandlarining xatna to‘ylari ham o‘tkazib berildi.