Prezident Shavkat Mirziyoyev 64 yoshga to‘lgani munosabati bilan uni “chin yurakdan tabriklab, samimiy qutlov va ezgu tilaklarini yo‘llagan chet el davlat va hukumat, xalqaro tashkilotlar rahbarlariga, xorijiy siyosat va jamoat arboblariga, ishbilarmon doiralar vakillariga, O‘zbekistondagi mahallalar va mehnat jamoalariga, turli kasb egalari bo‘lgan barcha vatandoshlarga” chuqur minnatdorligini izhor qildi.

“Hech shubhasiz, men uchun g‘oyat qadrli bo‘lgan ushbu tabrik va tilaklarni ko‘p millatli O‘zbekiston xalqi va davlatiga yuksak hurmat hamda ehtirom ifodasi, mamlakatimizning dunyo miqyosida ortib borayotgan obro‘-e’tibori va nufuzining yana bir e’tirofi sifatida qabul qilaman”, — deyiladi Prezident matbuot xizmati tomonidan e’lon qilingan minnatdorlik xatida.

Shavkat Mirziyoyev “yurtda keng ko‘lamli demokratik o‘zgarishlarni amalga oshirishda hal qiluvchi kuch bo‘lib kelayotgan mehnatkash, mard va olijanob xalqqa yana bir bor o‘zining cheksiz farzandlik mehri va hurmatini bildirishdan behad mamnun”ligini alohida ta’kidlagan.

“Ishonchim komilki, xalqimizning fidokorona mehnati, ulkan bunyodkorlik salohiyati va hamjihatligi bilan yangi O‘zbekistonni barpo etish, el-yurtimizning tinch-osoyishta hayoti va farovonligini ta’minlash bo‘yicha o‘z oldimizga qo‘ygan yuksak ezgu-maqsadlarga, albatta, yetamiz”, — deya qo‘shimcha qilgan Prezident Shavkat Mirziyoyev.

Eslatib o‘tamiz, O‘zbekiston Prezidenti Shavkat Mirziyoyev 24-iyul kuni 64 yoshga to‘ldi. Uning tavallud kuni munosabati bilan, jumladan, xorijiy davlat va hukumat rahbarlari tabriklar yo‘llagani haqida avval xabar berilgan edi. Qayd etish joiz, Prezident 2020-yili ham uni tug‘ilgan kuni bilan tabriklaganlarga minnatdorchilik bildirgan edi.