Buxoro viloyati IIB JXX JTSB Kinologiya bo‘linmasi xodimlari o‘zlariga biriktirilgan xizmat itlari yordamida yurtimiz tinchligi, xalqimiz osoyishtaligini ta’minlash, jinoyatlarni «issiq izida» fosh qilishda ibratli ishlarni amalga oshirib kelmoqda. 

Soha vakillari tomonidan joriy yilning o‘tgan davrida to‘rt oyoqli ko‘makchilar ishtirokida 13 ta jinoyat ochilishiga erishildi. Jumladan, 11 ta o‘g‘rilik, 2 ta giyohvandlik vositalari bilan bog‘liq jinoyat fosh etildi. Shu bilan birga, viloyat miqyosida o‘tkazilayotgan ommaviy va profilaktik tadbirlar chog‘ida xavfsizlikni ta’minlashda ham kinologlar faol ishtirok etishyapti.  

Shu yilning 10-yanvar kuni Romitan tumani IIB xodimlari tomonidan Gazli shaharchasida tezkor tadbir o‘tkazildi. Tadbirga Kinologiya bo‘linmasi 1-guruh kichik inspektor-kinologi, kichik serjant Bobir Shodiyev o‘ziga biriktirilgan «Bond» laqabli xizmat iti bilan jalb qilindi. Mazkur tadbir davomida «Baynalmilal» mahallasi Istiqlol ko‘chasida yashovchi X.R.ning uyi ko‘zdan kechirilayotganda, xizmat iti bir nimanidir sezgandek bo‘ldi. Shunda kichik serjant B.Shodiyev sadoqatli ko‘makchisi boshlagan tomon yo‘naldi. «Bond» yotoqxonadagi divan tomon qarab voviladi. Osoyishtalik posbonlari xolislar bilan divanni ko‘zdan kechirishganda, bir dona gugurt qutisi ichidan quritilgan holdagi marixuana giyohvandlik vositasi aniqlandi.  

Bundan tashqari, bo‘linma kinolog xodimlari respublika miqyosida o‘tkazilgan «Yoshlar orasida giyohvandlik vositalari va psixotrop moddalar tarqalishining oldini olish» oyligi tadbirlarida faol ishtirok etib, o‘rta ta’lim maktablari va oliy ta’lim muassasalariga 60 dan ziyod tar­g‘ibot ishlarini olib bordi. Tadbirlar chog‘ida kinologlar xizmat itlari bilan ko‘rgazmali chiqishlar ham qilishdi.