Joriy yilning 25-sentabr kuni parlament yuqori palatasining Xotin-qizlar va gender tenglik masalalari qoʻmitasi majlisida Senatning navbatdagi yalpi majlisida muhokama qilinishi rejalashtirilayotgan  qonunlar dastlabki tarzda koʻrib chiqildi.

Xususan, “Pedagogning maqomi toʻgʻrisida”gi Qonun senatorlar, tegishli vazirlik va idoralar vakillari, mahalliy Kengashlar kotibiyatlari mudirlari hamda soha mutaxassislari eʼtibor markazida boʻldi.

Qayd etilganidek, Qonun bilan pedagoglarning huquqlari, majburiyatlari, faoliyatining asosiy kafolatlari, mehnatiga yarasha haq toʻlash, ragʻbatlantirish va ijtimoiy himoya qilish tamoyillari belgilanmoqda.

Mazkur Qonun asosida pedagoglarning oʻz kasbiy faoliyatini yuritishi uchun tashkiliy-huquqiy shart-sharoitlar yaratiladi. Ularning ijtimoiy himoyasi taʼminlanadi va mamlakatimizda pedagogning maqomi tan olinadi.

Ushbu Qonun oʻqituvchi va muallimlarning jamiyatdagi nufuzi va mavqeini oshirishga xizmat qiladi.

Muhokama jarayonida qonun normalari bilan birga pedagoglar maqomini oshirish, ularning moddiy taʼminoti darajasini oʻstirish yuzasidan qilingan bir qator ahamiyatli ishlarga ham eʼtibor qaratildi.

Jumladan, soʻnggi yillarda pedagog xodimlarning ish haqi miqdorlari bir necha marta oshirilgani, alohida ustama haqlar joriy etilishi va taʼlim standartlari talablariga muvofiq pedagoglarning ish yuklamalari maqbullashtirilgani ham aytib oʻtildi.

Muhokama soʻnggida Qoʻmitaning tegishli qarori qabul qilindi.