Foto: Illustrativ surat

Prezidentning 2022-yil 30-dekabrda “Sirdaryo viloyati Boyovut tumanida quvvati 1573 MVt boʻlgan bugʻ-gaz elektr stansiyasini qurish” investitsiya loyihasini amalga oshirish chora-tadbirlari toʻgʻrisida»gi PQ-464-son qarori imzolandi. Bu haqda Energetika vazirligi axborot xizmati xabar bermoqda.

Qarorga koʻra, Sirdaryo viloyatining Boyovut tumanida 61,9 gektar maydonida zamonaviy “H” toifasidagi kombinatsiyalangan siklda ishlaydigan zamonaviy issiqlik elektr stansiyasi quriladi. Mazkur stansiya 2026-yilda ishga tushiriladi.

Loyiha doirasida foydali ish koeffitsiyenti 60 foizdan yuqori boʻlgan qurilmalarni oʻrnatish hisobiga yiliga 12 mlrd kVt.soat elektr energiyasi ishlab chiqariladi va buning natijasida yiliga 1,1 mlrd kub metr tabiiy gaz tejalishiga erishiladi. 

Shuningdek, obyekt qurilishi davomida 2500 nafar, ishga tushirilgandan soʻng esa 120 nafar doimiy ish oʻrinlari yaratiladi. Mazkur yirik loyiha xalqaro ochiq tender savdolarini oʻtkazish orqali Markaziy Osiyo va MDH davlatlarida amalga oshirilayotgan eng yirik investitsiya loyihalaridan biri hisoblanadi.

Eslatib oʻtamiz, Xalqaro moliya korporatsiyasining texnik koʻmagida oʻtkazilgan xalqaro ochiq tenderda 2021-yil 19-noyabr kuni “EDF International S.A.S.” (Fransiya), “Nebras Power Investment Management B.V.” (Qatar), “Sojitz Corporation” (Yaponiya) va “Kyuden International Corporation” (Yaponiya) kompaniyalari konsorsiumi gʻolib boʻlgan edi.

Maʼlumot uchun, 2022-yil 20-noyabr kuni Sirdaryo viloyatining Xovos tumanida 220 MVt quvvatli yangi IES ishga tushirildi. Shuningdek, joriy yil yakuniga qadar Shirin shahri va Boyovut tumanlari hududida 1500 MVt quvvatli zamonaviy IES ishga tushirilishi rejalashtirilgan.