Toshkent shahri Yunusobod tumani FHDYo bo‘limi binosi elektr energiyasidan qarzdorligi sabab avtomatik ravishda tarmoqdan ajratib qo‘yilgan. Bu haqda tuman elektr ta’minoti korxonasi mutasaddilari ma’lum qildi.

28-iyun kuni ijtimoiy tarmoqlarda poytaxtning Yunusobod tumanidagi FHDYo bo‘limida elektr energiyasi yo‘qligi to‘g‘risida xabar tarqalgan. “Toshkent shahar elektr tarmoqlari korxonasi” AJ mutasaddilari tomonidan tumandagi FHDYo bo‘limida o‘rganish o‘tkazilgan.

Aniqlanishicha, ushbu tuman FHDYo bo‘limining elektr energiyasi ta’minotidan jami 4 million so‘m qarzdorligi mavjud bo‘lib, idora binosi elektr energiyasidan qarzdorlik evaziga avtomatik ravishda tarmoqdan ajratilgan.

Ma’lum qilinishicha, respublika bo‘ylab elektr energiyasining barcha iste’molchilariga ASKUE hisoblagichlar o‘rnatilmoqda. O‘rnatilgan hisoblagichlarning qariyb 4 million 127 mingtadan ortig‘i billing tizimiga ulangan bo‘lib, hisob-kitoblar avtomat ravishda amalga oshirilmoqda. Bu elektr energiyasi hisobga olishni avtomatlashtirish markazida (Data center) markazlashgan holatda boshqariladi.

Ayni vaqtda tuman FHDYo bo‘limi tomonidan mavjud qarzdorlik bartaraf etilgandan so‘ng, bino barqaror elektr energiyasi bilan ta’minlangan.

Avvalroq O‘zbekistonda elektr energiyasi bo‘yicha 3,5 trillion so‘m qarzdorlik mavjudligi to‘g‘risida xabar berilgandi.