2020-yilda xalqaro sayohatlar soni 1 milliardga yoki 74 foizga kamaydi, shu tariqa o‘tgan yil turizm uchun kuzatishlar tarixidagi eng yomon yilga aylandi. Bu haqda BMTning Jahon sayyohlik tashkiloti (BMT JST) ma’lumotiga tayanib “Interfaks” xabar berdi.

“Koronavirus pandemiyasi va unga bog‘liq holda keng tarqalgan sayohat cheklovlari tufayli 2020-yilda xalqaro sayyohlarning tashrifi bir milliardga yoki 74 foizga kamaydi. Turizm eksportidan tushadigan daromad 1,3 trillion dollarga qisqardi, bu 2009-yilgi jahon iqtisodiy inqirozi keltirgan zarardan 11 baravar ko‘pdir. Bulardan kelib chiqib 2020-yilni xalqaro turizm uchun kuzatuvlar tarixidagi eng yomon yil deb atash mumkin”, — deyiladi BMT JST bayonotida.

Tashkilotning ta’kidlashicha, inqiroz sayyohlik sohasida 100-120 milliontagacha ish o‘rinlarining yo‘q bo‘lib ketish xavfini keltirib chiqardi, ularning aksariyati kichik va o‘rta biznesga to‘g‘ri keladi.

“Xalqaro turizm xavfsizligini yaxshilash bo‘yicha ko‘plab choralar ko‘rilganiga qaramay, inqiroz hali yakuniga yetmaganini bilamiz. Aksariyat mamlakatlar koronavirus mutatsiyalari tufayli sayohat uchun yangi va qat’iy cheklovlar o‘rnatmoqda, jumladan, majburiy testlar, karantin, ba’zi hollarda esa chegaralarni to‘liq yopish singari. Bularning barchasi xalqaro sayohatlarni tiklashga qarshi ta’sir qiladi. Shu bilan birga, bosqichma-bosqich emlash mijozlarning ishonchini tiklab, cheklovlarni yumshatish va vaziyatni normallashtirishga yordam beradi ”, — deyiladi bayonotda.

BMT JST ma’lumotlariga ko‘ra, pandemiya oqibatida sayyohlik bo‘yicha eng ko‘p zararni Osiyo-Tinch okeani mintaqasi ko‘rdi, bunga mintaqada o‘rnatilgan o‘ta qattiq cheklovlar sabab bo‘lgan. Mintaqaga kelgan xalqaro sayyohlar soni 2020-yilda 300 milliontaga yoki 84 foizga pasaydi. Yaqin Sharq va Afrikada tashriflarning kamayishi 74 foizni, Yevropada 70 foizni tashkil qildi. Shu bilan birga, 2019-yilga nisbatan mutlaq sayohatlar sonining eng katta pasayishi Yevropa qit’asida (500 mln) qayd etildi. Amerika qit’asida chet ellik sayyohlar sonining kamayishi 69 foizni tashkil etdi.

Avvalroq JSST koronavirusga qarshi emlanganlik to‘g‘risidagi hujjatning mavjudligi xorijga safar qilishning majburiy shartiga aylanmasligi lozim deb hisoblagan, AQSh esa mamlakatga keluvchi barcha uchun karantin joriy etilishini ma’lum qilgan.