BMTning Oziq-ovqat va qishloq xo‘jaligi tashkiloti (FAO) tomonidan O‘zbekistonda “To‘yib ovqatlanmaydiganlar ulushi” ko‘rsatkichlari qayta ko‘rib chiqildi, deb xabar beradi Davlat statistika qo‘mitasi.

Ma’lum qilinishicha, bunga sabab 2019-yilning 10—12-dekabr kunlari Toshkent shahrida FAO ekspertlari bilan o‘tkazilgan seminarda Statistika qo‘mitasi mutaxassislari O‘zbekistonning ko‘rsatkichlari bo‘yicha e’tiroz bildirib, FAO eksperti Dorian Kalamveros Navarro bilan bahs-munozara olib borgan.

Natijada FAO mutaxassislari Davlat statistika qo‘mitasi vakillarining keltirgan aniq isbot-dalillariga ko‘ra, O‘zbekistonning “To‘yib ovqatlanmaydiganlar ulushi” ko‘rsatkichini 2014-yildan boshlab, New Food Balance Sheet asosida qayta ko‘rib chiqqan. Qayta hisoblash natijasida ko‘rsatkichlar 2016—2018-yillar uchun 2,8 foiz (0,9 million kishi) va 2017—2019-yillar uchun 2,6 foizni (0,8 million kishi) tashkil etgan.

Bu ma’lumotlar 2020-yilning 13-iyul kuni bo‘lib o‘tgan “Jahondagi oziq-ovqat xavfsizligi va ovqatlanish holati 2020” (SOFI – 2020) hisoboti onlayn yig‘ilishida hamda FAO rasmiy sayti orqali e’lon qilingan.

FAO ekspertlari 2019-yilgi (SOFI – 2019) yig‘ilishida O‘zbekistonning 2016—2018-yillarda to‘yib ovqatlanmaydiganlar ulushi ko‘rsatkichlarini 6,3 foiz (2 million kishi) deb e’lon qilgan edi. Bu ko‘rsatkich bilan O‘zbekiston Markaziy Osiyoda Qozog‘iston (2,1 foiz) va Turkmanistondan (5,4 foiz) keyin uchinchi o‘rinni egallagan.

Eslatib o‘tamiz, 2019-yilning iyunida FAO konferensiyasida O‘zbekiston qishloq xo‘jaligi vaziri Jamshid Xo‘jayev ham nutq so‘zlagandi. Vazir konferensiyada butun dunyo e’tiborini tortayotgan muammo — oziq-ovqat xavfsizligini ta’minlash masalasiga alohida e’tibor qaratgan.