Ayni kunlarda maktab va bog'chalar ochilishiga tayyorgarlik ko'rilmoqda. Bu haqda Koronavirusga qarshi kurashish shtabi aʻzosi Rustam Ikromov maʻlum qildi.

"Ayni kunlarda Maktabgacha taʻlim vazirligi va Xalq taʻlimi vazirligi bilan hamkorlikda taʻlim muassasalarida amal qiluvchi sanitariya meʻyorlari ishlab chiqilmoqda. Mazkur meʻyorlar Adliya vazirligi tomonidan huquqiy ekspertizadan o'tkaziladi hamda barcha tomonidan bajarilishi birdek majburiyligi belgilab qo'yiladi. Shundan keyin maktabgacha taʻlim tashkilotlari va umumtaʻlim maktablariga faoliyatini boshlash uchun ruxsat beriladi", deydi Rustam Ikromov.

Shtab aʻzosining aytishicha, maktab va maktabgacha taʻlim tashkilotlarida o'z farzandlarimiz taʻlim olishadi. Bu masalada eʻtibor berish kerak bo'lgan jihatlar ko'p. Ishlab chiqilayotgan tadbirlar shunchaki hisobot uchun emas, balki bolalarni ijtimoiy hayotga tezroq qaytarish, karantin sharoitida ularning ruhiyatida kuzatilgan o'zgarishlarni bartaraf qilish, ular qatnaydigan muassasalarda koronavirus tarqalishiga imkon qadar to'sqinlik qilishga qaratilgan choralar belgilanishi lozim.

Eslatib o'tamiz, Xalq taʻlim vazirligi umumiy o'rta taʻlim maktablarida yangi o'quv yilini boshlash bo'yicha uchta stsenariyni taklif qilgan. 

Ahrorbek Hayrullayev