2025-yilning 13-14-mart kunlari toʻliq Oy tutilishi holati kuzatiladi. Oyning toʻliq tutilishi yerliklar uchun 'Qonli oy' hodisasiga guvoh boʻlish imkonini beradi, deb xabar bermoqda 'Live Science' nashri.

Xabarda aytilishicha, joriy yilning 13-14-mart kunlari Yerda toʻliq Oy tutilishi kuzatiladi hamda uning yuzasi qizgʻish tusga kiradi. Bu hodisa esa 'Qonli oy' nomi bilan mashhurdir.

Maʼlumotlarga koʻra, Oyning toʻliq tutilishi umumiy hisobda olti soat, toʻliq faza boʻyicha esa 65 daqiqa davom etishi kutilmoqda.

Taʼkidlanishicha, ushbu hodisa eng yaxshi koʻrinadigan joylari Shimoliy va Janubiy Amerika hududlariga toʻgʻri keladi. Yevropaning baʼzi hududlarida Oy botishi vaqtida qisqa muddatda bu hodisaga guvoh boʻlish mumkin. Sharqiy Osiyo hududlarida esa Oy chiqishi mahalda bu jarayonni qisqa muddatga tomosha qilish imkoni mavjud boʻladi.

Maʼlumot uchun, hodisaga 'Qonli oy' nomi berilishiga sabab, Oyning tutilish vaqtida qizgʻish tusga kirishi bilan bogʻliq. Bu jarayonda yorugʻlikning tarqalishi har xil boʻlib, Yer sayyorasi Quyosh nurlarini Oygacha yetib borishiga toʻsqinlik qiladi. Ammo, Quyosh nurlari Yer atmosferasinining maʼlum qismlari orqali oʻtib, Oygacha yetib boradi. Ayni shu jarayonda atmosferadan tarqaladigan koʻk, toʻq sariq hamda qizil ranglar Oyning qizgʻish tus olishiga sabab boʻladi.