Kengurular yurti dunyodagi eng xavfsiz davlatlardan biri hisoblanadi. Mamlakatda huquq-tartibotni saqlash uchun politsiya xodimlari, sheriflar, sud ijrochilari va boshqa mutasaddi idoralar xodimlari mas’ul. 

Avstraliya politsiyasi 1979-yilda bir qator turdosh idoralarning birlashishi natijasida tashkil topgan. Mamlakatda politsiya ikki darajada ishlaydi: federal va shtat politsiyasi. Shunga ko‘ra, birinchisi federal qonunchilikka, ikkinchisi shtatlar va hududlarda tartib hamda qonunchilikka rioya etilishini nazorat qiladi.

Federal jinoyat politsiyasi agentlari maxsus jinoyatlarni tergov qiladi. Ushbu jinoyatlarga yirik firibgarliklar, kontrabanda, giyohvandlik vositalarining noqonuniy aylanishi, uyushgan va xalqaro jinoyatchilik, terrorizm kabilar kiradi. Bundan tashqari, davlat politsiyasi yo‘l harakati qoidalariga rioya qilinishini ta’minlaydi, transportda huquq-tartibotni muhofaza qiladi, suv ustida qonuniylikni saqlaydi, terrorizmga qarshi kurashadi, qidiruv-qutqaruv ishlarini amalga oshiradi, jinoyatlarni fosh etadi, jamoat tartibini saqlaydi. E’tiborlisi, har bir shtat politsiyasining alohida o‘z xizmat libosi va nishoni bor.

Avstraliyada politsiya ta’lim muassasasiga kirishni istovchilar mamlakat fuqarosi va o‘rta ma’lumotli bo‘lish kerak. Bo‘lajak kursant har qanday avtomobilni boshqara olishi, puxta jismoniy tayyorgarlikka va mustahkam sog‘liqqa ega bo‘lishi lozim. Federal politsiya o‘quv yurtiga kirishda psixologik testdan o‘tish va birinchi yordam ko‘rsatish guvohnomasi bo‘lishi shart. O‘qish kursi 13 haftadan 24 haftagacha davom etadi. 

Politsiya o‘quv yurti bitiruvchisiga darhol diplom berilmaydi. U qasamyod qilgach, sinov muddatini o‘taydi. Sinov davri esa qaysi shtatda xizmat qilishiga qarab bir yildan bir yarim yilgacha davom etishi mumkin. Bu davrda bitiruvchi oddiy patrulь vazifasida faoliyat yuritadi. Sinovdan muvaffaqiyatli o‘tgan taqdirdagina, yosh xodimga jamoat tartibini muhofaza qilish sohasida faoliyat yuritishga ruxsat beruvchi diplom beriladi. Avstraliya politsiyasi konsteblь, serjant, tekshiruvchi, komandir, tuman komissari kabi bir qancha darajalarni o‘z ichiga oladi. 

Abdurahmon 

MUSTAFOQULOV

 tayyorladi.