Chortoq tumani IIB JXX HPB profilaktika inspektori, mayor Eldorbek Ne’matov Zafar Diyor nomli mahallada yashovchi I.M. «Damas» rusumli avtomashinani tegishli hujjatlarsiz bosh­qarib kelayotganligini aniqladi. Fuqaroga nisbatan qonuniy chora ko‘rish maqsadida tegishli hujjatlarni rasmiylashtirib, avtomashinasini vaqtincha jarima maydonchasiga joylashtirgandan bir hafta vaqt o‘tgach, fuqaro avtomashinasini jarima maydonchasidan chiqarib berish va o‘ziga nisbatan qonuniy chora ko‘rmaslik evaziga 400 ming so‘m pul berishini aytib, unga pora taklif qildi. Albatta, xodim bu taklifdan o‘zini yo‘qotib qo‘ymadi, fuqaroni dastlab tartibga chaqirdi, bu xatti-harakati qonunga xilofligini tushuntirdi, lekin u tushunishni istamay, xodimga qayta-qayta qo‘ng‘iroq qilib, iltimos qilishda davom etaverdi...

IIB tomonidan tezkor-tadbir davomida fuqaro I.M. xodimning xizmat xonasida unga 400 ming so‘m pullarni pora tariqasida berayotgan vaqtda ashyoviy dalillar bilan ushlanib, tegishli tartibda hujjatlar rasmiylashtirildi.

Shunga o‘xshash voqea «Do‘stlik» mahallasi hududida xizmat olib borayotgan vaqtda ham sodir bo‘ldi. Tungi xizmatga jalb qilingan Elyor Ne’matov mast holatda «Nexia-3» rusumli avtomashina boshqarib kelayotgan fuqaro A.S.ni to‘xtatib, uning ulovini jarima maydonchasiga joylashtiradi. Katta miqdorda jarima to‘lashdan ko‘ra, ichki ishlar organi xodimi bilan kelishib qo‘ya qolgan ma’qul, deb o‘ylagan fuqaro Eldorbekning qaysar, murosasiz, o‘z kasbiga sadoqatli ekanini bilmagan chog‘i. Xullas, tu­shuntirishlar kor qilmagach, mayor E.Ne’matov qat’iy chora ko‘rmasa bo‘lmasligini tushunib yetdi. Eldorbekning xizmat xonasida 400 AQSH dollarini berayotgan vaqtda A.S. qo‘lga olindi.

Xulosa o‘rnida aytmoqchi bo‘lganimiz, jamiyatda qonunlarga bo‘ysunish tinch va osoyishta hayot garovi ekanini har bir fuqaro his qilishi shart. O‘z kasbiga sadoqatli, vijdonli xodimning bu xatti-harakati ana shu yo‘ldagi sa’y-harakatlarning amaldagi ifodasidir. 

Gulchehra BUVAMIRZAYEVA,

o‘z muxbirimiz. 

Namangan viloyati.