Namangan shahrida 'Agrobank' xodimini oʻz tanishlari 3-qavatdan tashlab yubordi. Bu haqda 'Xalq soʻzi'ga Bosh prokuratura matbuot kotibi Hayot Shamsutdinov maʼlum qildi.

Bildirilishicha, voqea Namangan shahar Obihayot MFY Ibrat koʻchasida joylagan 10-uyda sodir boʻlgan. 36-xonadonda ijara asosida yashab kelayotgan 22 yoshli X.M. hamda uning tanishi N.L. bilan birgalikda 21 yoshli A.M. (Bank kassiri) bilan oʻzaro janjallashib ketib, A.M.ni qasddan oʻldirish maqsadida xonadoning yotoqxona oynasi romiga majburlab chiqarib, uni qoʻp qavatli binoning 3-qavatidan pastga majburan tashlab yuborgan.

Shundan soʻng, ular yashirinish maqsadida 'Spark' rusumli avtomashinasida voqea joyidan nomaʼlum tomonga qochib ketib, yashiringan.

A.M.ga esa voqea sodir boʻlgan vaqtda xonadonning hovlisida boʻlgan fuqarolar tomonidan yordam koʻrsatilib, u Respublika shoshilinch tez yordam ilmiy markazining Namangan filialiga olib borilgan. Shifokorlarning dastlabki maʼlumotnomasida, fuqaro A.M.'jarohatlar ogʻirlik darajasiga koʻra 'hayot uchun xavfli boʻlgan ogʻir tan jarohati' guruhiga kirishi koʻrsatilgan.

Qayd etilishicha, mazkur holat yuzasidan Jinoyat kodeksining 25,97-moddasi 2-qismi 'p' bandi bilan jinoyat ishi qoʻzgʻatilib, X.M. va N.L. JPKning 221-moddasi tartibida ushlangan.